Wolves tan khawpui a ri ring

Oklahoma City Thunder chuan playoff khel turin tling tawh mah se an inthlahdah lo a, nimin zing khan 116-103 in Minnesotta Timberwolves an hneh a, Chet Holmgren leh Shai Gilgeous-Alexander te an che ṭha lehpek hle.

Paycom Center, Oklahoma City-a inkhelah Thunder tan Holmgren-a'n point 21 neiin a score sang ber a, rebound vawi kua a la bawk. SGA chuan point 20 neiin assist 10 a nei bawk a, Chet leh Shai hian double double an siam ve ve a, team innghahna an ni.

Inhliam avanga chawl Alex Caruso a rawn kir tawh bawk a, Caruso hian point 17 a nei nghal a, defence lamah pawh a ṭangkai lehpek hle.

Caruso bakah hian Isaiah Joe (20), Jared McCain (15) leh Ajay Mitchell (11) te an khel ṭha a, OKC chak nan an thawh hlawk hle.

Wolves tan Julius Randle-a'n point 32 score-in inkhel zingah a score hnem ber a, Wolves tan Anthony Edwards (19), Ayo Dosunmu (18) leh Donte DiVincenzo (16) te khel ṭha viau mah se an vanduai zan an tawng a, OKC hneh nan a tawk zo lo.

Western Conference table-ah Wolves hi paruknaah an awm a, playoff khel pha chinah awm mah se match 10 chuang khelh tur a la awm avangin thlamuang taka awm a la fuh lo a, playoff khelh pha lo thei dinhmunah an la ding reng.