RG Stadium êng hnuaiah AFC-in Chennai mikhual dawn

Mizorama I League khelh a nih hnua floodlight hnuaia I League match hmasa ber chu vawiin tlai dar 5:00 hian khelh a ni dawn a, Mizoram Premier League nomawi chawi hlim Aizawl FC chuan I League champion lai Chennai City an mikhual dawn. 

Aizawl FC coach Standly Rosario chuan, "Point thum aia tlemah lungawi kan tum lo. Mahni muala khel tur kan ni a, Mohun Bagan kan draw tawh bawk si avangin chak a pawimawh a ni," tiin Vanglaini a hrilh a, inkhel hmuhnawm a beisei ngam ang. 

Chennai City coach Akbar Nawas chuan Aizawl FC chu team ṭha tak ni mah se point thum hmu tura lokal an nih thu a sawi bawk a, Singaporean coach chuan, "Point thum aia tlem hmuh tum sain ka khel ngai lo," a ti!  Coach pahnihin chak an tum thu an sawi ngam a, squad en pawhin an intiat tawk hle - zaninah inkhel hmuhnawm beisei a sual lo a, Mizo aiawhin Aizawl FC an inlan dawn e. 

Aizawl FC-in MPL-ah ro an rel a, an phu ang ngeiin champion nomawi an chawi. Mizo club-in an squad neihsa thuam ṭha turin player an lakluh belh nual a, mahse striker Abdoulaye Kanoute chu damlohna avangin a inlan thei dawn lo. 

Midfielder Amadou Alou Sissoko erawh buaina a nei lo a, midfield-ah hian MPL-a inkawp fuh Paul Ramfang-zauva leh captain Alfred Jaryan an la awm bawk. MPL-a goal 12 khungtu Lalremsanga'n hliam tenau a neih avangin a dinhmun sawi chian theih a la ni lo a, mahse tawnhriat nei ṭha William Lalnunfela, MPL best forward Isak Vanlalruatfela leh Rochharzela te an awm avangin tlarhma hi lungphanna tur a ni lo. 

Tlarhnungah MPL ang thoin Richard Kasagga chu I League-ah rintlak a ni a, C. Lalrosanga nen an inkawp ang - defender thar Joseph Adjei chu vawiinah Aizawl a lo thleng dawn chauh a, Kingsley Obumneme visa a la fel thei lo bawk. 

MPL season tawp lam leh I League bul ṭan a innang chho a, Aizawl FC fixture a hautak hle - hetichung hian Mizo club-in Bagan an chelh thei a, Neroca ngam lo mah se Indian Arrows chu 2-1 in an hneh zui. I League-a an match hnuhnung ber hnuah Aizawl FC-in MPL nomawi an chawi a, Standly chuan an tan fuih phurtu a nih thu a sawi. Indian coach tawnhriat nei ṭha chuan, "League harsa tak pahnih, in ang lo tak khelh kawp a ngai a, a hautak ṭhin hle. 

"MPL a zo a, ka thaw huai mai! Nomawi kan chawi bawk a, hei hi kan tan chuan min fuih phurtu a ni. Ka naute hian thu an awih a, an nungchang a ṭha bawk a, theihtawp an chhuah ṭhin," tiin Vanglaini a hrilh. 

East Bengal leh Mohun Bagan pawh lo enkawl tawh Standly chuan, "Chak kan duh a, mipui puihna kan mamawh tel. Bagan kan chelh theih chhan kha entu mipuiin min puih vang a ni a, Mizo aiawhtu club kan nih anga mi au phur turin mipui kan sawm a ni," a ti. 

I League champion lai Chennai City hi season hmasa nena khaikhin chuan player engemawzatin an chhuahsan avangin an ṭha lo zawk tia sawi theih a ni a, hei hi coach Akbar Nawas pawhin a pha lo. Swiss Super League club FC Basel-in 26% share an neihna club hian an match hmasa berah 1-0 in Trau hneh mah se match hnihnaah Punjab FC chu 3-1 in an ngam lo a, AFC lakah insiamṭhat an tum ang. 

Chennai coach Akbar Nawas chuan, "Season hmasaa kan player pakua vel kan chan a, champion team kha kan ni tawh lo. Nomawi humhim ka inbeisei lo - mahse he thu tho hi nikumah pawh khan ka sawi," tiin Vanglaini a hrilh a, thilmak thlen nawntir theih a nih thu a sawi. 

Nawas-a'n player a chan thu sawi mah se season hmasa I League-a goal 21 khungtu Pedro Manzi a la nei a, tawnhriat nei ṭha Katsumi Yusa a nei a, keeper pasang Nauzet Santana a la awm a, midfielder thiam bik Adolfo Miranda dinhmun a chiang lo thung.