Zanin MSL league round khar zan

Mizoram Super League season 11 league round chu zaninah zawh fel a ni tawh dawn a, dar 5:30-ah Zarkawt BCA leh Tuikual South BC te an inkhel dawn a, dar 8:30-ah Saron BC leh Chanmari BC te an inhmachhawn ang.

BCA vs TKS

Tun season-ah dan pangngaiin BCA an khel ṭha a, Lalrina Renthlei khel thei lo mah se harsatna an tawk lo a, semifinal lut hmasa ber an nih bakah Khatla TBL chauh hneh loh an nei.

BCA tan an ram pawn player te bakah an Mizo player te an hmuhnawm a, Zonunsanga, Lalnunpuia Renthlei leh H. Lalhmachhuana te an khel ṭha ṭhin a, Matthew Remtluanga Sailo a ṭangkai viau bawk a, zaninah pawh anni hi BCA innghahna tur an ni.

Tun season MSL-ah Tukual South BC-in beisei an pha lo a, an khingpuite lakah an tlawm vek. Tuikual South hian semifinal beiseina an nei tawh lo a, relegation game khel tura an inbuatsaih a ngai tawh zawk.

Mahse Tuikual South hian Thawhṭanni zan khan Zemabawk BC an barakhaih ṭep a, point riat chiahin an chak lo. An foreigner Quentis Davis a hmuhnawm a, Zarkawt BCA lakah thilmak thlentir thei turin theihna an nei a, an Mizo player ten an thlawp ṭhat a ngai dawn thung.