Mizoramin nomawi pathum an chawi ta

Mizoramin BCCI hnuai inelnaah nomawi pathum an chawi a, pahnih hi Mizo nulate chawi a ni. BCCI Women's U23 One Day Trophy Plate-ah Mizoramin March 13, Zirtawpni khan final-ah Sikkim run 82-a hnehin an champion.

Ṭhumvawra vannei Sikkim-in vawm hmasak thlangin Mizoramin over 50 chhungin wicket kua hlohin run 166 an siam. Captain Lalhmangaihsangi'n run 38 a siam a, Karie Chakma chuan run 21 a siam a, Thelma Laldinthari'n thi loin run 19 siamin Jacinta Lalṭanpuii'n run 18 a siam bawk.

Sikkim vuak hun a thleng a, Mizoram bowler-te an ngam lo hle. Bualpui nula Sandhia Rai chuan wicket sarih zet a la a, ZD Lalnunhrili'n wicket hnih lain, Margareth Malsawmliani'n wicket khat la ve bawkin over 28.5 chhungin Sikkim-in run 85 chiah siamin an thi fai vek.

Sandhia Rai chu final-ah player of the match atana thlan a ni a, ani hi tun tournament-ah wicket 15 lain wicket la hnem ber a ni. Player of the series atan Jacinta Lalṭanpuii thlan a ni a, Jacinta hian run 290 siam bakah wicket 12 a la bawk.

BCCI hnuaia inziahluh hnuah Mizoram hian tournament 15 an hmachhawn tawh a, ṭum sarih final lutin vawi thum an champion. Women's U23 One Day Trophy Plate hma hian nikum December khaan hmeichhe Under 19 plate group-ah Mizoram an champion a, hemi thla vek hian Syed Mushtaq Ali Trophy-ah Mizoram mipa team an champion lehnghal.

Tun ṭuma Women's U23 One Day Trophy Plate inelnaa Mizoram tana nomawi rawn hawntu Mizoram hmeichhe team hi CAM chuan Lengpuiah an hmuak a ni.

Mizoram Squad

Shivangi Raj Singh (Captain), Lalrinfeli (Vice Captain), Lalhmangaihsangi, Lallawmawmi, Thelma Laldinthari, ZD Lalnunhrili, Vanlalremtluangi, Zothansangi, Jacinta Laltanpuii, Malsawmtluangi, Sandhia Rai, Lalnunmawii, Karie Chakma, Palak Arun Kumar Patel, Unnati Sunil Nayak

Support Staff : Lalruatsanga (Head Coach), Zonunsangi Fanai (Manager), VL Tluangpuii (Physio), Sakib S Mulani (S & C Coach)