Mahuma Memorial-ah Ramhlun Venglai an champion

Mahuma Memorial 1st Division Screening Tournament-ah Ramhlun Venglai chuan final-ah Chanmarians wicket ruka hnehin an champion.

Final hi Suaka Cricket Ground, Sihhmuiah March 16, Thawhṭanni khan khelh a ni a, RVL-in vawm hmasak an thlang. Chanmarians hian bat hmasain over 39.3-ah run 162 siamin an thi fai vek.

CCC tan Sahil Sharma a che ṭha a, half century (54) a siam. Karan Chhetry leh Alfred H. Hmar ten 25 runs ve ve an siam bawk a, mah se RVL bowler-te an ngam lo.

RVL captain Joseph Lalthankhuma'n 30 runs chauh a pe a, wicket thum a la. K. Vanrotlinga (28/2) leh Rodawngzela (36/2) ten wicket hnih ve ve an la bawk.

Ruahsur vangin over tihtawi a ni a, RVL tan over 35-ah 145 runs siam a ngai. RVL opener Samuel Lalremkima'n run khat mah a siam lo a; Johan Lalbiakkima (32), Vanlalhruaitluanga (32), captain Joseph Lalthankhuma (31) leh captain K. Vanrotlinga (44) te an chet ṭhat avangin chak turin harsatna an tawk lo.

Ramhlun Venglai hian over 24.4 lekah run 148 an siam a, wicket li chauh hlohin hnehna an chang. Cricket tuichilh hmasa RVL hian tualchhung cricket an thunun hle.

RVL champion-na tura thawh hlawk Johan Lalbiakkima'n tun inelnaah run 349 a siam bakah wicket 16 a lain player of the tournament-ah an thlang. Chanmarians champion zo ta lo mah se Sahil Sharma-a'n run 563 a vaw chhuak a, best batsman-ah an thlang. Kulikawn CC bowler Lalrempuia'n wicket 22 a la a, wicket la hnem berin best bowler a ni.