Lille-in UCL beisei zel

French club hlun Lille chuan Thawhṭanni zan khan 2-1 in Rennes an hneh a, table-ah panganaah awmin season thara Champions League khelh an tum zel.

Lille tan Matias Fernandez-Pardo leh Hakon Haraldsson ten goal khat ve ve an khung a, Rennes tan Esteban Lepaul-a goal khung chu scoreline timawitu chauh a ni.

Roazhon Park-a inkhelah mikhual team Lille-in goal an khung hma a, minute hnihna lekah Fernandez-Pardo-a'n keeper chiah a hmachhawn hnuah a pet goal a, a team hma a hruaipui.

Minute 47-naah Haraldsson-a'n hnai tak aṭangin goal a khung ve a, an hmahruaina a belhchhah. Icelandic midfielder Haraldsson tan tun season-a goal ruk a khungna chiah a ni.

Rennes tan Lepaul-a'n minute 59-naah chiang takin a pet goal a, an si phurh a sut ṭhen. Lepaul hian tun season-a a goal 14-na khungin a team tiphur viau mah se, goal dang an khung belh thei tawh lo a, Lille-in hnehna an chang.

Lille hian point 44 hmuin palinaa awm Lyon chu point thum chauhin an pha lo a, season thara UCL khel turin kawng dik an zawh mek. Lille hi Europa League-ah la damin last 16 first leh-ah Aston Villa an hneh lo a, Ningani zan hian second leg khel turin Villa park-ah an leng lut dawn.