Hmasawn zel turin ka inpeih - Hamilton

Ferrari driver Lewis Hamilton chuan Pathiannia Chinese Grand Prix an tlan zawh hnuah hmasawn zel tura a inpeih thu a sawi a, Japanese Grand Prix lo awm tur atan a phur tawh hle.

Vawi sarih lo champion tawh Hamilton chuan, "Ka ṭhat dan berin ka rawn let niin ka hria a, rilru leh taksa lamah pawh ka harh ṭha hle a, hmasawn zel turin ka inpeih.

Ka kum te a lo tam ve tawh avangin tun thlasika training kan neih kha hautak ka ti hle a, ngai awh leh tur pawhin hun a duh rei. Christmas niah khan season ka ṭan dan turah ka rilru ka siam fel a, car thar nen hei aia ṭha hian ka la rawn kir leh dawn chauh," a ti a, a aia sang thlen a la tum.

Kum 41 mi Hamilton hian Ferrari a zawm hnuah a thlensan ber ṭum a tawng a, Chinese GP hi intlansiak pangngaiah podium a thlen vawi khatna a ni.

F1 hi FIA-in a lo tih ṭhin danin car regulations a thlak thar kum a ni a, car bakah engine, ke size thar leh wing zawng zawng a tharin an thlak vek a, Australian GP-ah khan hman ṭan a ni.

Sawiselna tam tak karah Hamilton hi car thar khalh nuam titu zingah a tel a, car-in thli a dawl theih dan an siam tharte chu ṭha a ti zawk.

British driver Hamilton chuan,"Thil thar kan la hriat loh tam tak a awm a, a hmasaa mi nen a danglam avangin a harsa deuh mai thei, mahse keichuan a nuam ka tihna a bo phah chuang lo. Car-te hi khalh a nuam sawtin ka hria a, car hmasa ho aiin control an nuam zawk," a ti.

Hamilton bakah Mercedes driver George Russel pawh rules thar duhtu zingah a tel a, Verstappen nen inel a chak thu a lo sawi tawh. Russel chuan," Tunah chuan team zawng zawngin engine an nei ṭha tawh a, chuvangin Max (Verstappen) pawh a phur sawtin ka ring a, ani nen inel ka châk tawh hle," tiin F1 thil thlak danglam chuan a tiphurin ṭha a ti.

Russel hi Australian GP ah a chak a, tunah Hamilton a rawn thlen san bawk avangin rules thar duhtute an thleng sang zel a, hetihlai hian sawiseltu zinga langsar tak Verstappen chu beisei angin a la tlan hleithei lo thung a, car thar faktu aia sawiseltute an thlensan loh avang hian mipuiin an sawi zui nasa hle.