Diaz dilna an hnawl

Bayern Munich chuan an forward Luis Diaz-a red card hmuh hnuk dawk turin dilna theh lut mah se pawmsak an ni lo a, referee ngeiin a tihsual palh a nih thu a sawi chungin match khat hrem a ni dawn tho!

Kartawp Bundesliga inkhelah khan Bayern Munich hian Bayer Leverkusen chu 1-1 in an draw. Minute 42-naah Nicolas Jackson chu hnawhchhuah niin, minute 84-naah dive vangin Luis Diaz chu a yellow card pahnihna pek a ni bawk.

He inkhela referee Christian Dingert chuan, "Diaz-a yellow card pahnihna ka pek kha ka ennawn leh a, thutlukna ka siam sual tih ka inhria. Khatiang chiah khan inkhelh laiin hmu chiang ila, ka hnawt chhuak kher lo ang," a ti.

Referee-in hetianga a sawi chung hian Bayern Munich-in an player red card hnuk kir tura an ngenna chu German football thuneitu sang Deutscher Fußball-Bund (DFB) chuan an pawm loh thu an sawi.

DFB Sports Court chairman Stephan Oberholz chuan, "Diaz khan goalkeeper kha va tawh fuh reng tumin a ti ve bawk a ni," a ti a, "Thutlukna kha dik lo hul hual ni se, red card kha hnuhkir theih a ni ang. Mahse, dik lo hulhual a ni si lo," a ti bawk.

Kum 29 mi Diaz hian tun season-ah Bayern tan inelna hrang hrangah match 37 khelin goal 21 a khung tawh a, assist vawi 17 a nei. Bundesliga lama a red card hmuh hian zanin inkhel turah erawh a nghawng dawn lo.

German champion hian Champions League last 16 second leg-ah zanin dar 1:30 hian Atalanta an mikhual dawn a, first leg-ah 6-1 ngawta hnehna an lo chan tawh avangin an tlang mai a rinawm.