Chelsea an hrem dawn

English club Chelsea chuan 2011-2018 inkara agent, FIFA hnuaia inziaklut lo leh mi hrang (third party) te hnena pound maktaduai 47 zet an pek avangin hrem an ni dawn.

London club hian pound maktaduai 10 an chawi dawn bakah kum khat chhung player la lut thei lo turin hrem an ni dawn a, thla kaw chhung academy transfer an nei thei dawn lo bawk.

FIFA-in football player agent te chu licensed nei turin a phut tawh bakah, third party hi an awm a phal tawh lo. Third Party te avang hian 2007 khan West Ham United chuan pound maktaduai 10 an lo chawi tawh.

Third party te hi investor ang an ni a, player hmabak nei êngte chu an hlutna (transfer value) an leisak a, player-ten club thar an zawm apiangin an man aṭangin an transfer value an leina zat percentage an chang ṭhin. Sum avangin player-ten club hrang hrang an zawm phah ṭhin avangin third party ownership hi phal a ni tawh lo.

Chelsea hian hetianga player an lakluh zingah hming langsar tak tak an awm a, Eden Hazard, Samuel Eto'o, Willian, Ramires, David Luiz, Andre Schurrle leh Nemanja Matic te chu an tel niin Premier League chuan a tarlang. Club-in tih dik loh an neih lai hian player-te erawhin an hriatpui lo a, thiam lohna an nei lo thung.

Kum 2023 khan Chelsea hian 2012-2019 inkara an sum hman dan information EUFA hnehah an pek dik tawk loh avangin hrem an lo tawk tawh a, pound maktaduai 8.6 an chawi.

Pawisa chawi tur leh player la lut thei lo tura hram ni mah se Chelsea an vannei a, point paihsak an ni dawn lo thung. Manager Liam Rosenior chuan he thil thleng hi 'rilru la pengtu' tiin a sawi a, Champions League-ah rilru an pek thu leh an hremna chu hun lo kal zela club tichaktu tur niin a sawi a, a player te thildangin a tihbuai a hlau hle.