Punjab leh Goa an inhnehtawk

Thawhṭanni zan Indian Super League inkhelah Punjab FC-in FC Goa an mikhual a, Punjab club hian minute 48-naa Effiong Nsungusi hnawhchhuah vangin player 10-in khel zui mah se, 1-1 a inhnehtawkin an ṭang tlang a, point khat an hlawh chhuak thei.

Guru Nanak Stadium, Ludhiana-a inkhelah Punjab tan Nsungusi chuan minute 27-naah goal hmahruai a khung a, 1-0 in chawlhlawk an hmang. Mahse, second half ṭan aṭanga minute thumna lekah Nsungusi chu Goa defender Pol Moreno lakah mawi lo takin a che a, red card pek a ni.

Goa-in player tam zawk an nih chhawr zui vatin, Dejan Drazic chuan minute 53-naah si phurh sutna goal a khung ve leh a, 1-1 a ni. Mahse, Goan club hian hun tawp thlengin goal dang an khung thei tawh lo a, team pahnihin point an insem.

Punjab hi an league match hmasa bera 1-0 a Jamshedpur FC an ngam loh hnuah an tlawm leh tawh lo - Bengaluru (2-0) an hneh a, mahse, NorthEast United (1-1) leh FC Goa (1-1) an draw thung.

FC Goa hi tun season-ah la tlawm lo mah se, league match nga an khelh tawhah vawi hnih chiah an la chak a, vawi thum dang an khingpui an draw - champion tum tan result a ṭha tawk lo.

Punjab-in Mizoram player kawl an nei lo a, FC Goa tan Dinthar tlangval Ayush Chhetri chuan inkhel bul ṭanin, Serchhip striker Daniel Lalhlimpuia chu bench aṭangin a lut bawk.