Fiorentina-in relegation zone hlat

Thawhṭanni zan Serie A inkhelah Fiorentina chuan 4-1 in Cremonese an hneh a, relegation zone an chhuahsan a, Italy League sang bera inhamtan an tum zel.

Fiorentina tan Fabiano Parisi, Roberto Piccoli, Dodo, Albert Gudmundsson ten gal khat ṭheuh an khung a, Cremonese tan David Okereke goal khung chu an mualpho lutuk tur hliahtu chauh a ni.

Stadio Giovanni Zini, Cremona-a inkhelah team pahnihte tlak hlau an nih vangin an inhnehtawk hle a, mikhual team tan Parisi-a'n minute 25-naah keeper kap karah a khung a, a team hma a hruaipui.

Fiorentina an phur laklawh a, minute sarih hnu lawkah Piccoli-a'n goal kilah tak khungin an hmahruaina a belhchhah a, Italian forward Piccoli goal khung a tawih hle. Goal hniha hmahruai chungin chawlklawh hman a ni.

Second half-ah pawh Fiorentina bawk an hlauhawm a, minute 49-naah Dodo-a'n thui tak ball a tlanpui hnuah defender leh keeper bumin goal ruakah a pet goal a, solo goal ropui a khung.

Minute 57-naah Okereke-a'n Cremonese tan hnai tak aṭangin a pet goal a, Fiorentina keeper David De Gea-a'n a en liam. Fiorentina defender ten Okereke an veng ṭha tawk lo.

Cremonese phur chhung a rei lo a, minute 70-naah Gudmundsson-a'n an goal lina leh an chak nemnghehna goal a khung a, nuamsa takin Fiorentina an chak.

Tun season-ah Fiorentina-in beisei an pha lo a, season tluanin relegation zone-ah an awm, mahse tun hnaiah an harhchhuak a, an match hnuhnung pangaah vawi khat chiah an tlawm a, 16-naah awmin relegation zone an chhhuahsan, inhmantan an duh chuan match kua khelh tur la awmah chetsual a thiang tawh lo.