Zemabawk BC-in semifinal lut

Zemabawk BC chuan Thawhlehni zan khan Chhinga Veng BC chu 99-73 in an hneh a, Mizoram Super League season 11-ah semifinal an lut. Zemabawk BC hma hian Zarkawt BCA, Khatla TBL leh Mission Veng Hotshots ten semifinal an lut tawh bawk.

Hawla Indoor Stadium, Republic Vengthlanga inkhel hnuhnung zawkah Khatla TBL-in 89-78 in Mission Veng Hotshots an hneh. Coach H. Laldinsanga (Mapuia) kaihhruai Khatla hian Mission Veng an hneh avangin pahnihnaah an awm a, final an luh chauhin an hmelma Zarkawt BCA an hmachhawn thei tawh ang.

Zemabawk an tho

Match hmasa pathum chak lo mah se Zemabawk an hnual phah lo a, match liah hnehna chang vekin, palina aia hniamah an awm thei tawh lo a, semifinal an lut.

Zemabawk BC te harh nan an fans ten player te tluk zetin an thawh hlawk a, player te phurna an pe nasa. Zemabawk club hian final thlen an tum a nih chuan an fans te an pawimawh dawn.

Lalropuia'n Zemabawk tan point 28 neiin a score hnem ber a, player of the match-ah thlan a ni bawk. Ropuia bakah hian Shashank J Rai (23), K. Lalthianghlima (19) leh Pratyanshu Tomar (11) te an khel ṭha a, Zemabawk BC tan an ṭangkai takzet.

Chhinga Veng BC tan an rampawn player King Revolution chuan point 33 neiin rebound vawi 14 a la a, Revolution hian a ṭhiante puihna a dawng ṭha tawk lo a, a tlawm zawkah an ṭang.

Ṭhazuala a ṭha

Inkhel hnuhnung zawkah Khatla TBL chuan 89-78 in Mission Veng Hotshots an hneh a, Hotshots hian semi final lut tawh mah se, TBL an hneh loh avangin semifinal-a an tum tur a chiang lo.

TBL tan captain Vanlalṭhazuala'n point 19 a score a, player of the match-ah thlan a ni. Ṭhazuala hi match hmasa berah damlohna vangin khel thei lo mah se a dam ṭhat meuh chuan team innghahna ber a ni.

Ṭhazuala bakah Emmanuel VL Awmpuia'n point 19 bawk a nei a, Makhel Ahkim Mitchell (14) leh Palpreet Singh Brar (17) te TBL chak nan an ṭangkai bawk.

Hotshots tan foreigner Darnell Johnson-a'n point 29 neiin a score hnem ber a, Johnson hian rebound vawi 18 zet a la bawk. Inter state player Japjit Singh Gill-a'n point 15 a nei a, captain Lalruatkima point 13 neiin khel chhe lo mah se an vanduai zan an tawng a, TBL hneh nan a tawk lo.

Nizana Saron BC leh Chanmari BC te inkhel result a zirin table-a danglam dawn a, Chanmari an chak chuan Hotshots hi palinaah an awm dawn.

Saron-in hnehna an chang a nih chuan Hotshots hi pathumnaah an awm dawn a, Zemabawk BC palinaah an awm thung ang. He thu i chhiar meuh chuan club tinte dinhmun a chiang tawh ang.