UCL-a beisei pha lo Guardiola

Pep Guardiola-a'n Europe inelna sang berah nomawi vawi thum a chawi tawh a, Champions League hming a put hnuah amah aia champion tam manager chu vawi nga champion tawh Carlo Ancelotti chauh a awm. Heti chung hian Pep hi UCL-ah a hlawhchhamah a ngaih a ni a, manager ṭha bik hian a chunga beiseina sang tak hi a phak bik lo.

Spanish manager Pep hian Barcelona, Bayern Munich leh Manchester City te enkawl tawhin league nomawi vawi 12 a chawi tawh a, Catalan club hi UCL-ah vawi hnih champion pui tawhin Bavarians a champion pui thei lo. Europe inelnaa la champion ngai lo Man City hian Pep-a hnuah UCL vawi khat an champion a, nomawi dang an beisei leh a nih chuan an nghah leh rih a ṭul dawn.

Real Madrid an hneh loh zawhah kum 55 mi Guardiola chuan, "Tute pawhin min ban an duh vek a, engtikniah emaw chuan in duh ang ngeiin ka rawn la mangṭha ang che u," tiin a sawi a, tun hnaiah result an neih ṭha tawk loh avangin Manchester City a chhuahsan hun hi a hnai chho hret hret niin a lang.

Pep chuan sawi chhunzawmin, "Kan hmalam hun a êng a, season tharah a aia ṭha zawkin kan rawn kir ang," a ti. Heta ṭang hi chuan Eithad Stadium chhuahsan mai a tum lo niin a lang a, mah se a ṭawng chhoh zel danah erawh City manager nih reng a tum lo.

Spanish manager chuan, "Kum 10 hnuah chuan manager hna hi ka chawlhsan ve tawh ang a, chumi hunah chuan City ka la ni reng dawn. Champions League-ah pawh ka rawn kir leh dawn ka tih chhan chu an zinga mi ka la ni reng," tiin a sawi a, season tawpa chhuak tura ngaitu an awm a nih pawhin thilmak a ni lo.

Pep ropui daltu langsar ber chu Real Madrid an ni a, amah pawhin a hrechiang. City manager chuan, "Champions League vawi ruk chawi tawh tur ka ni," tiin a sawi. City a enkawl hnuah UCL knockout stage chinah Real ṭum li a hneh lohna a ni a, Bayern Munich a enkawl laiin semifinal-ah Real Madrid hi a hneh tawh lo bawk.