PSG-in Stamford Bridge an zawh chim e!

Parc des Princes-ah Chelsea-in goal nga an chhuah a, goal hnih an khung thung. Stamford Bridge-ah Chelsea-in goal thum an chhuah a, goal an khung ve miah lo!

Mikhualte ralṭitna hmun Stamford Bridge chu mikhualte tlangnelna khelmual a chang ta a, Thawhlehni zan khan Champions League round of 16 second leg-ah Paris St-Germain chuan 3-0 in Chelsea an sawp.

PSG tan Khvicha Kvaratskhelia, Bradley Barcola leh Senny Mayulu ten goal khat ṭheuh an khung a, Chelsea-in a chhanletna tur an neih loh avangin inkhel pahnih belhkhawmah 8-2 in an tlawm - an mualpho takzet.

Chelsea hi Premier League lamah season thara Champions League khel lo thei dinhmunah an ding mek bawk a, tunlai chu London club tan khua a var thei meuh lo.

Beiseina leh a tak ram

PSG khelmuala 5-2 a an tlawm khan fans tam takin beiseina an nei tawh lo a, Chelsea chu UCL aṭanga tla felah an ngai vek tawh. Mahse, Chelsea boss Liam Rosenior erawh a ni ve lo a, beiseina a nei!

English coach hian, "Champions League-ah 'comeback' ropui tak tak kan lo hmu tawh ṭhin a, Stamford Bridge-ah ngei pawh comeback hmuhnawm tak tak kan lo hmu tawh ṭhin. Result thlak danglam turin kan theihna zawng zawng kan hlan dawn a ni," a ti.

Mahse, beiseina leh a tak ram erawh thil hrang daih a ni a, goal khung mamawh Chelsea-in an rin aia hmain goal an chhuah. Minute rukna lekah PSG ball thlawh luh chu Chelsea defender Mamadou Sarr-a'n dan tumin a chesual.

Sarr nena ball inchuhtu Kvaratskhelia-a'n ball hi chang zuiin, Georgian forward hian Robert Sanchez-a venah a duhnaah tak dahin, 1-0 in hma an hruai fel der!

A harsa tawh

Goal thum khung mamawhtu Chelsea-in minute rukna lekah si an phur belh a, goal li khung an mamawh zui - an goal chhuah chhanah Sarr-a'n mawh a phur a, a ball dan tum danah a inthlahdah hret tih a lang a, discipline tlachham Chelsea an fuh lo tluang zel.

Chelsea-in goal khung ngei tumin na takin an nawr let a, mahse, goal chhuah hmasa bawk an ni. Midfield-ah Moises Caicedo-a'n ball pass tumin, Andrey Santos a pet per a, hei hi PSG lamin chang zuiin, Chelsea nawr let nan an hmang.

PSG fullback Achraf Hakimi ball pek chu Barcola chuan a hman thiam loh lam, a ke vei lamin ṭha zetin a pet a, first leg-a chesual Filip Jorgensen aia rin Chelsea keeper Robert Sanchez-a'n tih theih a nei lo.

Blues-in an goal hnihna an chhuah hian minute 14-na chauh a ni a, Stamford Bridge-ah Chelsea-in hnehna chang turin thilmak an mamawh a ni satliah lo a, thil thleng ngai lo an thlentir a ngai a ni ber tawh!

Mangṭha Chelsea

Chelsea-in 2-0 a hnufual chungin chawlhlawk an hmang a, dressing room lam an pan chu fans-in an au el hluah hluah tawh - an chak theih an beisei tawh lo a, player-te khelh danah an lungawi lo.

Blues hian chance nei lo an ni lo. Second half ṭantirah Joao Pedro pawhin chance a nei a, mahse, a vanneih zan a ni lo - Cole Palmer, Enzo Fernandez, Pedro Neto, Trevoh Chalobah leh Jorrel Hato te pawhin chance nei mah se, an chhawr lo vek!

Chelsea boss Rosenior-a'n thutlukna mak a siam zui - Enzo, Palmer leh Pedro te la chhuakin substitution a siam a, an hotupa berin an tlawm tih a pawm ta em ni chu aw, tih mai tur a ni.

Pedro thlaktu Liam Delap-a'n chance nei mah se, a chhawr lo a, PSG erawhin an chance neih an chhawr chiang hle - minute 62-naah Mayulu chuan an goal thumna a khung a, PSG chakna a nemnghet.

Chelsea an talbuai

Ṭum dang ang thoa Chelsea buaina chu player mal tihsual, rilru pek tawk loh leh inthlahdah a ni - first leg-ah pawh an tlawm ngei a, mahse, minute 75 chhung chu team pahnih an intiat tawk tih kan hmu.

Jorgensen-a chetsual hnuah an tho leh ta lo a, an tlawm. Second leg-ah pawh Sarr-a inthlahdah zar zoin goal an chhuah a, goal hnihna lah Caicedo-a tihsual vang bawk a ni.

Chelsea an vanduai ve bawk. Malpui hliam vangin captain Reece James an chhawr thei lo a, PSG hmachhawn hmaa Newcastle an hmachhawn avangin player ṭhenkhat an chau tih a lang tel.

Blues ṭantute an club neitu hmasa leh club siam liantu Roman Abramovich hming lamin an au rual a, club neitu a nih laia dik lo taka player lakluh nan sum a sen avangin Blues hi tun hnaiah hrem ni mah se, Abramovich an la ngai tho tho - tuna club neitu Blueco lam an au el bawk.