Unai Emery leh Rogers te chhuak mai thei

English Premier League club Aston Villa manager Unai Emery leh midfielder Morgan Rogers te chu an dinhmun a derthawng a, season thara Champions League an khelh phak loh chuan Villa an chhuahsan dawn niin khawthlang chanchinbu ṭhenkhat chuan an tarlang.

Tun season ṭan aṭangin Aston Villa an che chhe lo a, table chung lamah hun tam zawk an hmang. Mahse tun hnaiah beisei an pha lo a, Manchester United-in lehpelin palinaah an tla a, United hi point thuma phak loin, season thara UCL khel lo thei dinhmunah an ding.

Hetiang boruak karah hian manager Emery bakah Morgans Rogers te chu an dinhmun a chiang lo a, club chhuahsan an rilruk nia sawi a awm. Rogers hi tun season-ah a khel ṭha a, tun season EPL-ah goal riat a khung tawh.

English midfielder Rogers hi Premier League club lianin an duh a, an zingah Chelsea hming a ring ber. Kumina khelh tur World Cup-ah England coach Thomas Tuchel-a'n a koh a beiseiawm.

Aston Villa legend Gabriel Agbonlahor chuan, "Rogers hi player ṭha tak a ni a, World Cup-ah pawh ṭha taka a khelh ngei a rinawm. Mahse Villa hian Champions League an khel pha lo a nih chuan a khel phak tur team zawm a duh dawn a, a chhuak a nih chuan Villa hi Fulham te angin club vantlang mai an ni leh dawn," a ti.

Villa tan season chhia ni lo mah se anmahni ṭantute an lungawi lo a, an lungawi loh chhan tak erawh January transfer-a player an lakluhah niin a lang.

Emery hian Villa player hlui pahnih Tammy Abraham leh Douglas Luiz te a la lut a, player pahnihte hi a tir lamah khel chhe lo mah se beisei an phak lo chhunzawm a, manager Unai Emery lakah an ṭuan.

Villa hian zanin dar 1:30-ah Europa League last 16 an khel leh dawn a, first leg-a 1-0 a an hneh tawh Lille an mikhual dawn. Man United hneh zo lo hlim an nih avangin Villa-in chak ngei an duh dawn a, Europa League chiah nomawi an beisei theih tawh avangin Unai Emery naute hian chak ngei an tum ang.