SC Delhi khelmualah Jamshedpur

Zan hnih an chawlh hnuah Indian Super League chu zaninah khelh ṭan a ni leh dawn a, zan dar 7:30-ah match li an khelh tawha chak la nei lo Sporting Club Delhi chuan Jamshedpur an mikhual dawn.

SC Delhi hi Hyderabad FC tih ṭhin kha niin, an club hian Delhi lamah awm hmun an sawn avangin SC Delhi tih hming an inphuah a, Jawaharlal Nehru Stadium, New Delhi-ah JFC pawh hi an lo mikhual ang.

Delhi club hian league match li khel tawhin chak an la nei lo a, vawi thum a tlawm zawkah ṭangin, vawi khat an khingpui an draw a, an match hnuhnung berah Mumbai City chu 2-2 a an draw avangin inrintawkna an nei thar ang.

SC Delhi-ah hian Aizawl FC aṭanga an lakluh Augustine Lalrochana chuan hmun pawimawh chang nghalin, ISL-ah goal khat a khung tawh a, Kolasib forward Ramhlunchhunga leh Isaac Vanmalsawma an kawl tel bawk.

Jamshedpur-in an match hnuhnung berah 2-1 in NorthEast United an ngam lo a, hemi hmaa match li an khelhah an chak vek thung - ISL hmahruaitu an nih loh phah a, SC Delhi lakah insiamṭhat nghal an tum dawn.

Men of Steel tan Mark Zothanpuia chu player pawimawh a ni a, East Bengal aṭanga an lakluh defender hi league match nga an khelh tawhah bul a la ṭan vek.

Serchhip tlangval Mark-a hian Hyderabad FC tan lo khel tawhin, ISL nomawi hial a lo chawi tawh a, club hming thlak ni tawh mah se, a tan chuan SC Delhi hi a club hlui ang a la ni.

Scottish coach lar Owen Coyle-a enkawl Jamshedpur hian Mark bakah midfielder C. Lalhriatpuia an kawl bawk a, champion an beisei avangin zaninah chak ngei an tum ang.