Carrick aia ṭha zawk an awm - Keane

Manchester United captain hlui Roy Keane chuan manager nghet atan Michael Carrick a ṭhat tawk loh thu a sawi a, Man United enkawl tura English manager aia ṭha an ṭhathnem thu a sawi.

Keane chuan, "Manager nghet turah ka la ngai lo. Amah aia ṭha an la awm. Tunah chuan buaina an nei lo. Match khat hmachhawn turin kar thumte inpuahchahna hun an nei a, hna a la awlsam. Thla thum liam ta khan Carrick hi manager nghet turin a hming lam ri ta se, in pawm lo hlawm viau ang.

"Tunah erawh a hun takah United a enkawl a, hna ṭha tak a thawk. Player-te hian manager nghet lo hi a lawm a, Carrick hian pressure hranpa a nei lo. Player 10-a khel Newcastle pawh a hneh thei lo a, Aston Villa lakah pawh an khel ṭha chuang lo," tiin Carrick chu manager nghet atan a pawm lo.

Man United hian Carrick hnuaiah Manchester City, Arsenal, Fulham, Tottenham, Everton, Crystal Palace leh Aston Villa te an hneh a, ṭum hnih chiah point an la hloh. Khualmualah West Ham United nen an inhnehtawk a, Newcastle lakah 2-1 in an chak lo a, point 27 hmuh theih aṭangin point 23 an hlawh chhuak.

Keane-a'n Carrick hi pawm lo mah se Wayne Rooney erawhin a thlawp viau thung. Rooney chuan, "Carrick hi 100% in manager nghet tur a ni. Team hian hruaitu rilru phili lo an mamawh a, club hrechiang an mamawh a, player-te hmangaihtu an mamawh bawk. Heng zawng zawng hi Carrick-a hian a nei vek a, thlak a ṭulna a awm lo," tiin a sawi thung.

Manchester United hi Premier League-ah table-ah pathumnaah an awm a, season thara Champions League khel turin an dinhmun a ṭha hle. Carrick-a hnuaia an result a ṭhat avangin manager nghet ni tura rinkai ber a ni a, club hruaitu tan pawh manager dang ruat ngam a harsa tawh ang.