Champions League last 16 Liverpool vs Atletico; City vs Madrid!

Champions League last 16 draw chu nimin tlai khan neih a ni a, champion lai Liverpool hmaah Spanish club ṭha Atletico Madrid an ding dawn!

Season hmasa Champions League final khelhna hmun kha Atletico khelmual Wan­da Metropolitano a ni a, Jurgen Klopp leh a nauten an ropuina hmunah vanneihna chhar leh an inbeisei ang. Liverpool hian zanin dar 1:15-ah League Cup quar­terfinal chu Aston Villa nen an khel dawn a, Under-23 boss Neil Critchley hoin player naupang rual an inlan dawn. 

Reds hian Nilaini zan dar 11:00-ah Monterrey nen Club World Cup semifinal an khelh a ngai bawk a, Qatar-a inelna hmachhawn tur hian senior team player tam zawk an kal a ni. Manchester City-in an la chawi ngai loh nomawi chawi turin fiahna hautak an paltlang a ṭul dawn a, Real Madrid nen Champions League last 16-ah an intawng dawn - kum 2016 semifinal-ah khan Real hian City hi an lo pet chhuak tawh a, hetihlaia City coach erawh Pep Guardiola niloin Manuel Pellegrini a ni thung. 

Chelsea leh Bayern Mu­nich inhmachhawn tur chu ngaihven hlawh zinga mi a ni a, Frank Lampard-a naute tan German champion paltlang hi hna hautak a ni dawn. English club zingah Tottenham Hotspur chu vannei bera sawi theih an ni a, German club ṭhang­duang RB Leipzig an tum dawn - Jose Mourinho leh a nauten quarterfinal an mitthla ngam ang. 

Tun hnaia team talbuai tak Napoli-in Barcelona an hmachhawn tur hi duhthlang thei ni se an thlan loh tawp tur niin a lang a, Borussia Dortmund leh Paris St-Germain inkhel tur hi en châkawm zinga chhiar tel chi a ni. Champions League last 16 first leg hi February 18, 19, 25 leh 26-ah te khelh a ni dawn a, March 10, 11, 17 leh 18-ah te second leg khelh a ni thung ang. 

Europa League round of 32 atan draw neih a ni bawk a, English club langsar zingah Arsenal chuan Olympiakos an hmachhawn dawn a, Manchester United leh Club Brugge an inkhel ang. Round of 32 first leg hi February 20-ah khelh a ni dawn a, second leg hi February 27-ah khelh tur a ni thung.