Mumbai-in Bengaluru an hneh

Thawhṭanni zan khan Indian Super League inkhel hmuhnawmah Mumbai City FC chuan 3-2 in Bengaluru FC an hneh a, hun pek belh minute linaa Rowllin Borges chu chak nan an hmang. 

Mumbai tan hian defender Subhasish Bose chuan minute 12-na lekah goal hmahruai a khung a, an hmahruaina belhchhah turin hun ṭha nei mah se Bose-a goal khung tur siamsaktu Mohamed Larbi chuan penalty aṭangin a hun ṭha a hlah. 

Bengaluru an beidawng lo - Mato Grgic (own goal) hmangin minute 58-naah an si phurh an sut. Mahse, an hlim chhung erawh a rei lo hle. Manchester City nena inzawm thar Mumbai club tan Diego Carlos chuan goal a khung leh a, 2-1 a ni. 

Hun tawp nan minute hnih chauh a awm tawh - Bengaluru-in penalty an hlawh chhuak ve leh a, Sunil Chhetri chuan a hlah duh ve lo. Minute awm dan enin team pahnih hi point insem mai tur angin an lang hman. Mahse, hun pek belh minute linaah Subhasish-a ball tauh chuan Rowllin Borges a per a, goal-ah a lut daih! Bengaluru tan chhanletna hun a awm tawh lo a, 3-2 in Mumbai City an chak. 

Zaninah ISL inkhel a awm dawn lo a, NorthEast United chuan Nilaini zan dar 7:30-ah Bengaluru FC hi an mikhual ang.