Real an vannei; Barcelona an um zel

Barcelona chak loh thu hre sa chungin Real Madrid an inlan a, hnehna chang se chuan La Liga table chung bera awm thei tur an ni. Mahse, Zinedine Zidane-a naute hian an hun neih ṭhat an bawhpelh a ni mai lo a, point hlawh chhuak turin vanneihna an mamawh tel. 

Real hian Pathianni zan khan Valencia chu 1-1 in an inhnehtawk pui a, an goal hi hun pek belh minute nganaa Karim Benzema khung a ni! Nilaini zanah Real hian El Clasico an khel zui dawn a, Barcelona hmachhawn tur club tan Valencia laka an result hi result ṭhaa chhiar chi a ni lo. 

Kartawp La Liga inkhelah Barcelona an chak zo lo a, Real fan-te an hlim hle. Mahse, Pathianni zan a lo thleng a, fan-te beisei angin an player-te an che thei bik lo. Valencia muala inkhelah first half chhungin goal kan hmu lo a, team pahnih hian point an insem mai a rinawm hman. 

Mahse, hun tawp nan minute 12 chauh a awm tawh tihah Valencia an inlar a, vengtu nei lo Carlos Soler chuan Daniel Wass-a siamsak aṭangin a khung. Hun tawp a hnai a, Valencia fan-ten an mualah Zidane leh a naute an tlawm dawnah an innngai tawh - a awm lo hran lo. 

Minute 90 a pel tawh a, hun pek belh a ni tawh. Mahse, hun pek belh minute nganaah Real Madrid-in corner an nei a, goal an mamawhzia hriain goalkeeper Thibaut Courtois pawh a tlan chhuak. 

Belgian keeper induhthawh-nain rah ṭha a chhuah a, corner aṭanga ball kal a tauh chu Valencia keeper Jaume Domenech chuan a lo dang. Spanish goalkeeper dan per hi Karim Benzema ke bulah kher a tla a, French striker hian a hun ṭha neih hlah a tum lo - 1-1 in inkhel a tawp a, point an insem. 

Kum 31 mi Benzema hian tun season-ah match 21 khel tawhin goal 16 a khung tawh a, kum tam tawh lamah pawh Europe-a striker 'hot' ber pawl a ni chho zel. 

Chanchin ngah Gareth Bale-a'n inkhel bul ṭan lo mah se minute 69-naah Welsh forward hi tlan luhtir a ni a, goal a keng tel lo. Bale hian Wales tana a khelhna lama chanchin a neih hnuin hliam a nei zui a, Valencia a hmachhawn hi kar hnih chhunga Real tana a inlan leh hmasak ber a ni. 

September 1 hnuah khan Real tan goal a khung leh tawh lo a, tun season-ah Madrid khaw club tan match 11 khelin goal hnih chiah a la khung! Kum 30 mi forward hian January-ah Real hi chhuahsan a duh nia sawi a awm a, kum thar lamah Real jersey ha chunga kan hmu tawh lo a nih pawhin a mak lo ang.