PSG an chak nuamsa

Pathianni zan French Ligue 1 inkhelah Paris St-Germain chuan player 10 a khel Saint-Etienne chu 4-0 in an sawp a, league nomawi an kawl lai humhim ngei turin kawng dik an zawh zel.

French champion tan hian Kylian Mbappe-a'n goal hnih a khung a, France rawlthar duhawm bakah hian Leandro Paredes leh Mauro Icardi te chuan goal khat ve ve an thawh bawk. Neymar chuan penalty a hlah thung a ni. Saint-Etienne midfielder Jean-Eudes Aholou chu minute 25-na lekah hnawhchhuah a ni a, team nem zawk an nih bakah player kim loa hun tam zawk an khelh a ngaih avangin mualneitu ni mah se tho chhuak tur an awm lo.

Tun hnai league match hnuhnung panga a hnehna changtu PSG hian point 42 an nei tawh, anmahni hnaih bertu Marseille aiin point sarihin an sang fal zawk a ni.