Juventus chakna Ronaldo

Cristiano Ronaldo goal hnih khung hmangin Juventus chuan an mikhual Udinese 3-1 in an hneh a, inkhel dangah Inter Milan leh Fiorentina te chu 1-1 in an inhnehtawk thung.

Pathianni zan Serie A inkhelah Juve tan Ronaldo hian minute kuana lekah goal hmahruai a khung, tun hnai match li chhung a zawna goal a khungna chiah a ni; chawlhlawk hma deuhin an goal hnihna a khung bawk. Defender Leonardo Bonucci-a'n an goal thumna a khung a, Portuguese forward Ronaldo-a'n hattrick siam theihna hun ṭha nei mah se goal ban a tih per hlauh. Hun tawp dawna Ignacio Pussetto goal khung chu Udinese tan awmzia a awm phak tawh lo.

Juve keeper Gianluigi Buffon-a'n Serie A match 646-na a khel tling chiah a, league match 700 khel tlingtu Paolo Maldini a phak lohna chu match khat chiah a ni - Italian goalkeeper hian match khel hnem ber record siam turin hmabak a nei tlem ta hle.

Inkhel dangah Inter Milan tana Borja Valero goal chu mualneitu lamin Dusan Vlahovic hmangin hun tawp dawnah an sut hram a, team pahnih hian point khat ve ve hmuin an inṭhaṭhen. Antonio Conte naute hian point hnih an hloh avangin champion lai Juventus nen an point neih zat (39 points) a inzat ta chiah, a zawna season riat champion tawh Turin club nek chhuak tur chuan tha thlah loa an kaltluan rei theih a ngai ang.