Ferrari leh Hamilton inhnaih?

Lewis Hamilton-a'n a hma hun a sawi chiang duh lo a, titi a ti tam chhunzawm zel. Mercedes driver hi Ferrari nen sawizawm a ni deuh reng a, Italian team nen hian inremna an nei thut a nih pawhin a mak lo ang.

Formula 1 vawi ruk champion tawh Hamilton hian Ferrari car a ṭhat thu a sawi fo a, a team awm mekna Mercedes tan ngaihthlak nuam a ni lo ang. Mercedes tana a contract neih lai nakkuma tawp tur pawh a pawtsei duh rih lo a ni.

Ferrari driver upa zawk Sebastian Vettel-a'n 2020 thleng daih contract a nei a, junior zawk Charles Leclerc erawh hun rei tak chhung atan inremna an neih pui mek thung.

Team CEO Louis Camilleri chuan, "Leclerc hian contract rei tak a la nei, Vettel pawhin season hmabak a la nei bawk. 2021 season-a driver kan hman tur tih fel nan chuan a la hma. Driver ṭhenkhat chuan kan car khalh an duh thu kan hria, thu lawmawm tak pawh a ni, mahse hmanhmawh taka thil tih fel ngawt chi a ni lo," tiin a sawi.