United leh Everton inhnehtawk

Manchester United phur vanglai leh manager nghet nei loa awm mek Everton chu 1-1 in an inhnehtawk. Pathianni zan Premier League inkhel dangah Tottenham chuan hun tawp dawna goal an neih hmangin Wolves 2-1 in an hneh hram thung.

Old Trafford-a inkhelah substitute Mason Greenwood chuan minute 77-naah an siphurh a sut hlauh a, mikhual lamin Victor Lindelof-a own goal hmanga an hmahruaina chu an hum tluan thei lo a ni. United hi Tottenhman leh Manchester City hneh hlim an ni, a sang pali zinga tel phak beiseina pawh a sang hman hle. Ole Gunnar Solskjaer-a naute hian match 17 aṭangin point 25 an nei a, khelh zat inangah season hmasa aiin point khatin an hmu tlem zawk.

Everton manager lailawk Duncan Ferguson-a'n a match hmasa zawkah Chelsea a hneh tawh, tun ṭumah pawh hian khaw vawt tak hnuaiah kawrlum pawh ha loin mual sir aṭangin a naute inkhel a vil a, inkhelh zawha fans hnena lawmthu a sawi leh chuan lawm a hlawh hle.

Inkhel dangah Spurs tana Lucas Moura goal hmahruai chu Wolves lamin Adama Traore hmangin an sut a, team pahnih hi an inhnehtawk mai dawn niin a lang hman. Amaherawhchu, hun tawp hma chiahin Jan Vertonghen chuan chakna goal khungin match 11 chhung tlawm loa kal tluang Nuno Espirito Santo naute an hneh.

Tottenham manager Jose Mourinho chuan, "Khualmualah league match bika chak nei loin season kan hmang kha a ni a, tunah erawh hun rei lote chhungin vawi hnih kan chak ta der mai," tiin Spurs a enkawl china an hmasawnna a sawi.

Wolves chungchang sawi zawmin Portuguese manager chuan, "Wolves player-te inpekna an sawi ka hre tawh ṭhin a, thua an sawi mai aiin a takah an bei nasa zawk. Tuna an dinhmun aia sang hi an thleng zel a nih pawhin a mak lo ang, team danglam leh ṭha tak an ni," a ti.