Mohun Bagan khelmualah Mumbai City

Zanin dar 7:30 hian tun season ISL-a inkhel en châkawm ber pawl en turin a awm dawn a, Lalengmawia Ralte khelhna Mohun Bagan chuan Lallianzuala Chhangte khelhna Mumbai City an mikhual dawn.

Mohun Bagan-in tun season ISL-ah tlawm la nei loin, table chung ber an luah mek a, match nga khelh tawhah vawi li chakin, vawi khat an draw - an draw result hi an match hnuhnung berah a ni.

Mumbai City an la tlawm bik lo - mahse, match nga an khelh tawhah vawi thum chakin, vawi hnih draw an nei thung a, Bagan nena an inkarah point hnih chiah a awm.

Zaninah Mumbai club an chak chuan Bagan an tlanpel thei dawn tihna a ni a, Kolkata club-in champion an tum chuan an elpui club lakah point hloh a thiang lo.

ISL-a club tam zawk sum vanga an buai lai pawhin Bagan an buai ve lo a, Indian player hlawh hnem ber pawl Apuia an kawl bakah A League-a hming chher tawh Jamie Maclaren, Jason Cummings leh Dimitri Petratos te ho an nei a, an ṭha hle.

Mumbai-in Indian player 'hot' ber pawl Lallianzuala Chhangte an kawl a, Lunglei tlangval hian tun season-ah goal thum a khung leh der tawh. Mumbai leh India tana a khelhpui ṭhin Apuia nena an intawng tur hi hmuh a châkawm takzet.

Zaninah Mumbai tan LZa bakah Lalnuntluanga Bawitlung chu bul ṭan tura beisei a ni a, bench aṭangin Zothanpuia a lut ṭhin bawk - Hmingthanmawia Ralte (Valpuia) erawh hrem vangin a inlan thei dawn lo.

Vawiin tlai dar 5:00-ah NorthEast United-in Odisha an mikhual dawn bawk. Highlander-ah hian Lalrinzuala, Lalbiakdika leh Fredy Chawngthansanga te an awm a, Odisha hian Isak Vanlalruatfela, K. Lalṭhathanga (Puitea), Lalrinfela Khiangte, Vanlalzuidika leh Jeremy Zohminghlua te an kawl thung.