Man City lakah Arsenal an zawr

Arsenal tana November Player of the Month chu goalkeeper, match a khelh zawng zawnga goal chhuah vektu Bernd Leno a ni - hei hian North London club dinhmun thui takin a sawifiah. Premier League champion Manchester City lakah 3-0 in an tlawm zui a, beiseina kâwl a la eng thei rih lo.

Pathianni zan Emirates Stadium-a inkhelah Man City tan Kevin de Bruyne chu a 'changtupa' a ni a, Belgium international midfielder hian goal ṭha bik pahnih a khung bakah Raheem Sterling tan a siamsak bawk; anmahni mualah ngei Gunners an zawr a, player hlawh hnem ber Mesut Ozil chet danin an inpumkhat lohna a lantir bawk.

Arsenal striker Gabriel Martinelli-a'n second 33-na lekah chak taka ball lalutin hun ṭha nei nghal mah se Manchetser City keeper Ederson a paltlang zo lo a, mikhual lamin na taka an vuak letna lakah erawh Gunners hi an inveng thei lo.

Box sir kil aṭanga Gabriel Jesus rawn pet let chu vengtu nei lo De Bruyne-a'n chiang zetin a hlap lut - minute khat leh second 29-na chauh a la ni! Arsenal midfield a pherh a, Lucas Torreira leh Matteo Guendouzi te inkawp chu Man City tan awlsam taka pal darh theih an ni.

Minute 15-naah Pep Guardiola naute hian counter attack aṭangin na takin an nawr let thut. KDB leh Jesus ten an khingpui tlarhnung chu awlsam takin an paltlang a, a tawpah vengtu nei loa awm Sterling chuan awlsam takin goal a khung.

Guardiola-a'n kum naupang te ni chunga a rin ngam Phil Foden-a hnen aṭanga a ball hmuh chu De Bruyne-a'n chak zetin a tlan pui a, box pawn aṭangin kawh zetin goal kilah a khung leh, chawlhlawk laiin mikhual lamin si thum faiin hma an hruai a; point thum hmu tur a chiang nghal vek.

Pep Guardiola nauten a zawna season thum nan Premier League nomawi chawi an tum a, an hma hun erawh an kutah a innghat tawh lo; Liverpool chetsual an ngaihchan tel a ngai. Reds nen an inthlauhna chu point 14 zet a ni tawh, a awlsam tawh lo ang.

Amaherawhchu, krismas laia point 10 bawr vela hmahruai hi nomawi chawi ngeina a ni lo tih hrechiangtu chu Liverpool hi an ni a, thlamuang takin an awm bik lo ang. Man City-in Arsenal an sawisa lai en phei chuan ngaihṭha taka awmna chi a la ni bik lo.

Manchester City manager Pep Guardiola chuan, "Inkhel hmuhnawm a ni a, result ṭha tak pawh kan hlawh chhuak ngei mai. Mahse, kan match hnuhnung zawka Manchester United kan ngam loh ṭum khan kawng hrang hranga tih ṭhat kan nei zawk.

"Nuam ti taka football mawi tak khelh chhuah hi Man City thil tum chu a ni a, keini chuan result chauh ni loin ka nute khelmual chhunga an chet dan hi kan ngaipawimawh tel bawk," tiin inkhel hmuhnawm chhawp chhuah zel a tum.

Result an nei ṭha lo a, player-ten thathona an neih loh bawk avangin Unai Emery an ban. Manager lailawk Freddie Ljungberg kaihhruaina hnuaiah pawh thil a la danglam tam chuang lo, an elpui lakah an chak lo a ni satliah loa anmahni mualah ngei an tlawm chiang hle.

Emirates Stadium-ah hian 2007 August thla khan Fulham player David Healy chuan ṭan aṭanga minute khat pawh tling loah goal a khung a, chumi ni loah chuan tun ṭuma De Bruyne goal kha goal an chhuah ran ber ṭum a ni hial.

Arsenal manager lailawk Ljungberg chuan, "Arsenal kan nihna chhawmnun leh kan tum a, ball hloh loa ken bakah rang taka inpek kual kan tum bawk. Mahse, tihsual neih zauh kara min rawn vaw let ṭhin kha kan tuar zo lo a ni, kan thinlungah chak duha tuihalna kan mamawh," a ti. City midfielder KDB chu player ṭha bik a nih thu a sawi bawk.

League match 17 khelh tawhah Gunners hian point 22 chauh an la hmu, pakuana dinhmun an luah; an hnuaia awm Crystal Place-in nizan khan hnehna an chang a nih chuan an la tlahniam leh thei. Nomawi sawi ngam a ni tawh lo a, harhtharna an chang thut a, en elpui club dang an chesual a nih ngawt loh chuan a sang pali zinga tel pawh beisei ngam a har tawh ang.