Barcelona-in goal sarih an khung!

Newcastle United-in vawi hnih ngawt an hnufual hnuah Barcelona chhang let ve ve mah se, inkhel a tawp meuh chuan team ropui zawk Barcelona chungnunna a lang a, Catalan club hian 7-2 ngawtin Newcastle United an sawp!

Champions League round of 16 first leg-ah Magpies leh Barca hi 1-1 in an lo inhnehtawk tawh a, Barca hian hun pek belha Lamine Yamal-a penalty hmangin draw result an hlawh chhuak hram.

Nilaini zanah, Nou Camp-ah team pahnih an intawng leh a, Barca-in Raphinha leh Marc Bernal-a goal hmangin vawi hnih hma an hruai. Magpies hian Anthony Elanga hmangin si phurh an sut ve ve a, minute 28 chhungin goal li a lut hman!

Newcastle-in Nou Camp-ah pawh Barca an hlau lo niin a lang a, mahse, a vuak let chu na tak a ni!

First half hun pek belhah Kieran Trippier chu Raphinha lakah foul-in video assistant referee (VAR) a inrawlh hnuah penalty an chawi.

Barca tan Lamine Yamal chuan a chhuih lut a, Newcastle an tho leh tawh lo - minute 51-naah Fermín López-a'n an goal lina khungin, Robert Lewandowski-a'n goal hnih a khung zui a, Raphinha pawhin a goal hnihna khungin, minute 72-naah a hmawr a bawk.

Newcastle lakah Barcelona an chak chiang a, Eddie Howe-a leh a naute beiseina chu Nou Camp-ah a thamral - Magpies tan ni rei lotê chhunga Barca vawi hnih hmachhawn a, a kar laka Chelsea hmachhawn bawk chu a hautak hret a ni ber mai!

La Liga hmahruaitu Barcelona-in UCL quarterfinal an lut a, semifinal luh inchuhin Tottenham Hotspur pet chhuaktu Atletico Madrid nen an intawng dawn.