Goal khung thiam Bayern an tlang

German clun lian Bayern Munich chuan Nilaini zan khan 4-1 in Atalanta an hneh a, aggregate-ah 10-2 a chakin Champions League quarterfinal an lut a, quarterfinal chinah Italian club an awm tawh lo.

Bayern tan Harry Kane-a'n goal hnih a khung a, Lennart Karl leh Luis Diaz ten goal khat ve ve an khung bawk. Atalanta tan Lazar Samardzic-a goal khung chu scoreline timawitu chauh a ni.

Insawpna chu

Allianz Arena-a inkhelah Bayern an chungnung tluan zak a, first leg-ah goal ruk an khung tawh avangin kamtu an nei lo a, goal chance an nei nghal.

Minute 21-naah Kane-a shot chu Atalanta defender Giorgio Scalvini-a'n a kutin a khawih palh a, minute thum zet ennawn a nih hnuah referee-in penalty a pe. Penalty hlawhchhuaktu Kane-a'n petin Atalanta keeper Marco Sportiello-a'n a dansak.

Italian club hi lawm hman viau mah se Sportiello-a'n penalty a dan laiin goal line a pel a, referee-in penalty a pet nawntir. Kane bawkin pet lehin a hlawh nawn tawh lo a, Bayern hma a hruaipui.

Goal an chhuah hnuah Atalanta an hlauhawm a, Charles De Ketelaere leh Mario Pasalic ten chance nei mah se goal hmaah an hriam tawk lo a, first half-ah goal dang a lut tawh lo.

Second half ṭan aṭanga reiloteah Raoul Bellanova-a'n chance a nei nghal a, Atalanta full back hian a pet na tawk lo a, Bayern keeper Jonas Urbig-a'n awlsam takin a dang.

Bavarians an insiamṭha a, minute 54-naah Kane-a'n buai nuai karah ball a vir chhuahpui a, goal kilah tak a pet lut nghal a, Bayern hmahruaina a belhchhah. Kum 32 mi Kane tan Champions League-a a goal 50-na chiah a ni.

Bayern an phur laklawh a, minute hnih hnu lawkah goal an khung lehnghal, Luis Diaz-a ball pek chu rawlthar duhawm Karl-a'n cool takin a pet goal. German forward Karl hi tun season-ah a che ṭha a, a inhliam loh chuan World Cup-ah an ram tan a inlan ngei a rinawm.

Minute 70-naah Diaz-a'n goal a khung ve a, Karl-a ball pet chhuah um lutin, keeper a chip khum a, goal liin hma an hruai. Atalanta-in minute 85-naah Samardzic hmangin goal khung ve mah se, goal an chhuah hnem avangin inlehthal ngaihna a awm tawh lo a, nuamsa takin Bayern an chak.

Hello Treble

Tun season-ah Bayern an che ṭha a, Bundesliga-ah match riat khelh tur an la neihah point kuain hma an hruai fal mek. German Cup-ah semifinal khelh an hmabak bawk a, Champions League-ah quarterfinal an inpetkai avangin treble champion thei dinhmunah an ding.

Chutihrualin Bayern tan thil a awlsam dawn lo a, league match an khelh hnuhnung berah Bayer Leverkusen an inhnehtawkpui a, an la chesual thei tih a lang. Vincent Kompany naute hian treble champion nih an duh chuan inthlahdah a thiang lo.

Record siamtu Kane

English forward Harry Kane chuan UCL-a a goal 50-na a khung avangin a tan zan chhinchhiah tlak a ni a, Kane hian hetiang zat khung tur hian match 66 a mamawh a, Lionel Messi nen an mamawh zat a inang a, Cristiano Ronaldo aiin match 25-in a mamawh tlem zawk.

Kane hian UCL-ah Tottenham Hotspur tan goal 21 a khung a, Bayern tan goal 29 a khung bawk. Bayern a zawm hnuah Kane a che ṭha nghal a, tlarhma lamah an innghahna ber a ni.

Tun hnaiah inhliam avangin a inlan tam lo a, a awm loh chhungin Nicolas Jackson-a'n a hmun ruak a hnawh khat. Spurs forward hlui Kane tel loin Bayern tlarhma an hriam tawk lo a, treble champion an nih theih nan Kane a dam ṭhat a pawimawh dawn.