Atletico hnehtu Spurs an tla

UEFA Champions League last 16-ah Tottenham Hotspur-in an mualah Atletico Madrid 3-2 in hneh mah se khualmualah 5-2 an tlawm avangin Europe inelna sang ber aṭangin an tla. Aggregate-ah London club 7-5 in an chak lo a, Atletico Madrid erawhin quarterfinal-ah La Liga lama an elpui Barcelona an hmachhawn ang.

Nilaini zan inkhelah hian Spurs game a nung ṭha a, chak pawh an phu. Mahse, first leg-a an chetsual avangin thawhchhuah a harsa tawh. Spurs tan Randal Kolo Muani leh Xavi Simons ten goal an khung a, Spanish club-in Julian Alvarez leh David Hancko te hmangin siphurh an sut.

Inhnehtawk thei dinhmuna an din hnuah Dutch midfielder Simons-a'n penalty aṭangin Spurs chakna goal a khung a, quarterfinal pui zo lo mah se an muala Atletico an hneh avangin inrintawkna an ngah sawt ang.

Igor Tudor hote hian Premier League-ah insawrbing a ṭul dawn a, Spurs hian match 30 aṭangin point 30 chauh an hmu a, 16-naah awmin relegation zone-a awm West Ham aiin point khat chauhin an hmu tam. Tottenham hian March 22, Pathianni zan hian an hnuai chiaha awm Nottingham Forest an hmachhawn dawn a, inkhel pawimawh bik a ni ang.

Inkhelh banah Tudor chuan, "Inelna aṭanga tlak hi hrehawm kan ti. Chutihrualin ṭha takin kan khel a, mipui lamin min thlawp ṭha a, lawmna tur a awmin ka hria. Player-ten beiseina an nei thar a, kan team dinhmun thlirin phurna thar hi kan mamawh. Pathiannia kan inkhel tur hi a pawimawh a, kan hmalam hun hriltu tur erawh a la ni lo. Season tawp match hnuhnung pathum a pawimawh ang," tiin a sawi.

Europe an khelh leh hun tur chungchang sawiin Tudor chuan, "Season tharah chuan kan khel dawn lo a, a dawt lehah chuan eng nge kan khelh loh ang. Season liam taa nomawi kan chawi khan player-te inrintawkna a pe a, Europe inelnaah tawnhriat ṭha tak a pe bawk," tiin Premier League aṭanga relegate turah a inngai lo a, Europe inelna hmachhawn leh vat theih a inbeisei zawk.

Season liam taa Europa League champion Spurs hian champion puitu Ange Postecoglou an ban a, Thomas Frank hoa season bul ṭanin player hliam an ngah avangin season an hmang ṭha lo. Kumin February 11 khan Frank hi an ban a, a aiah Tudor hi lalutin result a ṭha chuang lo. Premier League-ah Tudor hnuaiah chak an la nei lo a, tun ṭum hi hnehna an chan hmasak ber a ni.