Mizoram Super League - club tinte dinhmun a chiang

Mizoram Super League season 11, league round chu a hmawr bawk fel a ni tawh a, Nilaini zan khan Zarkawt BCA chuan 104-74 in Tuikual South BC an hneh a, inkhel hnuhnung zawkah Chanmari BC-in 76-61 in Saron BC lakah hnehna an chang bawk.

BCA bawk

Tun season-ah dan pangngaiin Zarkawt BCA an che ṭha a, Khatla TBL lakah an vanduai tih loh chu an chak vek.

Nilaini zan inkhelah pawh table-ah pakhatna an nih chian tawh avangin match danga khel tam lo player an luhtir hnem.

BCA tan mi paruk zetin point sawm an score tling a, an zingah Lalfakzuala a langsar ber a, point 14 a score bakah assist 11 a nei a, Faka hi a club hlui lakah a chet ṭhat avangin player of the match-ah thlan a ni.

Tuikual South BC tan an foreigner Quentis Davis-a'n point 29 nei mah se, a teammate te puihna a dawng ṭha tawk lo a, BCA lakah a tlawm zawkah an ṭang a, tun season-ah chak an nei lo a, an relegate dawn.

Chanmari an him

Inkhel hnuhnung zawkah Chanmari BC leh Saron BC ten pangana nih an inchuh a, a tawpah Chanmari an dingchang a, relegation playoff khelh ngai loin an him.

Chanmari BC tan Lalrozama'n point 17 score-in a score hnem ber a, player of the match-ah thlan a ni.

Rozama hi a Reuben Lalsangkima (14), Mohammad Ishan (10) leh Michael Liansanga (11) ten an thlawp ṭha bawk.

Chanmari BC hian hman hruai fal lai berin point 23 zetin an inthlau a, harsa lutuk loin hnehna an chang.

Hetihlai hian Saron BC tan Hugo S Chotter (16), T Lalhriatzela (12) leh Lawmsangzuala (8) te khel chhe lo mah se Chanmari hneh nan a tawk lo a, a tlawm zawkah an ṭang.

Saron BC hi an chak loh avangin paruknaah an awm a, an hnuai chiaha awm Chhinga Veng BC nen relegation playoff an khel dawn a, MSL-a inham tan an tum ang.