Lakers tan Doncic vul zel

Luka Doncic chu Los Angeles Lakers tan a thiam thil a lantir zel a, nimin zing khan Lakers hian 116-124 in Houston Rockets an hneh a, dan pangngaiin Doncic a langsar.

Toyota Center, Houston-a inkhelah Lakers tan Doncic-a'n point 40 a score a, assist 10 neiin rebound vawi 9 a la bawk a, triple double a siam teuh hle.

Slovenian point guard Doncic bakah veteran LeBron James a khel ṭha a, James hian point 30 a score. Kum 41 mi James hi a kum a tawm ve tawh a, court chhungah pawh tun hma a pha lo tih a hmuh theih.

Mahse a ṭhiam ngaiin a la thiam reng tih a lantir a, team tan ban pawimawh a nih bakah player naupang zawkte inringtawk taka an khelh theih chhan a ni.

Rockets tan mi paruk zetin point 10 an score tling a, Alperen Sengun-a'n score hnem berin point 27 a score a, Amen Thompson (26) nen point khatin an in score tam hleih. Kevin Durant leh Jabari Smith Jr ten point 18 an nei bawk.

An khelh chhiat zan ni lo mah se Rockets vanduai zan a ni thung a, Doncic leh LeBron khelh ṭhat zan an tawng fuh a, point riat chauhin an chak lo.

Lakers hian match 69 khel tawhin vawi 44 an chak tawh a, Western Conference table-ah pathumnaah an awm a, an chungah playoff khel tura tling tawh Oklahoma City Thunder leh San Antonio Spurs chiah an awm.

Lakers hian match 13 khelh tur an la nei a, an chesual viau a nih loh chuan playoff khel turin an tlin a beiseiawm.