CAF hnenah Senegal zualko dawn

Senegalese Football Federation chuan, African Cup of Nations (AFCON) champion an nihna chhuhsak an nih chungchangah, khawvel infiamnaa thuneitu sang ber Court of Arbitration for Sport (CAS) hnenah an kal tur thu an sawi.

SFF chuan, "CAF thutlukna hi a lai lo a, pawm thiam a harsa a, African football hmai a tibal a ni," an ti - thla hnih liam taa khelh zawh tak, AFCON-ah Senegal hi an champion a, mahse, Confederation of African Football (CAF) chuan tun hnai khan Morocco chu champion-ah an puang!

Senegal hi 3-0 a chak loa puan niin, an aiah inelna thlengtu Morroco chu champion thar an ni.

Champion nomawi an chhuhsak chhan hi final-a player te titaua ground an chhuahsan vang a ni.

January 18 khan Senegal leh Morocco te final-ah an inhmachhawn a, goal lut loa an inhnehtawk laiin hun tawp dawnah Morocco-in penalty an hmu a, penalty an chawi danah Senegal player te an lawm lo a, ground chhuahsanin minute 17 laiin inkhel a khaihlak.

Captain Sadio Mane-a'n a koh luh hnuah penalty pet a ni a, Morocco tan Brahim Diaz-a'n a hlah. Extra time-ah Senegal tan Pape Gueye-a'n goal awmchhun khungin Senegal an champion zui.

AFCON dan Article 82-a a inziah angin, player ten an khel duh tawh lo emaw, referee phalna loa hun tawp hmaa khelmual an chhuahsan a nih chuan chak lo anga ngaih an ni a, inelna aṭanga paih tur an ni bawk.

Article 84-in eng team pawhin Article 82 an bawhchhia a nih chuan 3-0 a chak loah puan tur an ni, a tih bawk avangin Senegal hi chak lo zawkah an puang hnuhnawh a ni.