Ozil leh neuh neuh

Arsenal player hlawh hnem ber Mesut Ozil chu minute 59-naah lak chhuah a ni a, khelmual a chhuahsan hnuah a kutkawr bun lai hlipin a lungawi lohna lantir nan a pet zui bawk - fans lamin an lo 'boo' khum hluah hluah!

Germany international hlui hian buaina neuh neuh a ngah ta hle. Turkey president Recep Tayyip Erdogan thla a lakpui vangin an ram team-ah boruak ṭha lo a nei tawh, tun ṭuma City nen an inkhelh dawn hian Uighur Muslim chungchanga China sorkar a sawisel vangin China chuan an ramah inkhel hi an ti chhuak duh lo.

Man City lakah Ozil a khel ṭha tawk lo a, manager Ljungberg-a'n a la chhuak. Real Madrid player hlui hi an match hmasa lamah khelmual a chhuahsan dawnin Alexandre Lacazette lam hawiin thinur taka a ṭawng hmuh tur a 

awm tawh bawk.

Player ten an lungawi lohna an lantir ngam tawh chuan manager an zah tawk lo tihna a ni a, club chhung boruak a ṭha tawk lo tih pawh a kawk thei. Unai Emery-a'n a chhawr ṭhat duh loh midfielder hi manager emaw, club thuneitu lamin a chungchang an chinfel hma a ngai ang.