Momota a chungnung ber
2019 BWF World Tour Finals chu Pathianni zan khan a hmawr bawkna neih a ni a, mipa singles huangah Kento Momota a champion. Hmeichhe inelna lamah Chen Yufei chuan title a la ve bawk.
Mipa singles final hmuhnawm takah world number 1 Momota hian game a hloh hmasa zawk. Mahse, Japanese player hian darkar khat leh minute 27 an inkhelh hnuah 17-21, 21-17, 21-14 in hnehna a chang a, season kal laiah nomawi 11 ngawt a chawi thei a ni.
Kum 25 mi Momota chuan, "Inelna hautak a ni a, player ṭha hlir kan inhmachhawn avangin match tinah fimkhur a ngai em em a ni. A hnufual zawka ka ṭan pawhin ka beidawng duh ngai lo," a ti. World champion vawi hnih ni tawh Momota hi tun lai mipa badminton player hmuhnawm ber a ni a, 2010-a Lee Chong Wei-a'n title 10 a la lak tawh chu khumin season khata nomawi chawi hnem dinhmun a luah.
Hmeichhe singles lamah Chen Yufei chuan Taiwan nula Tai Tzu-ying chu 12-21, 21-12, 21-17 in a hneh. Chinese shuttler Chen hian world ranking chhuak tharah chuan Tai hi luahlanin a chung ber dinhmun a luah dawn a ni.
2019 BWF Finals Champion
Men's Singles Kento Momota
Women's Singles Chen Yufei
Men's Doubles Mohammad Ahsan
Hendra Setiawan
Women's Doubles Chen Qingchen
Jia Yifan
Mixed Doubles Zheng Siwei
Huang Yaqiong