Pathianni zan Madrid derby a pui dawn

Spanish club lian pahnih Real Madrid leh Atletico Madrid te chu Pathianni zan dar 1:30-ah an inhmachhawn dawn a, Real hi champion tuma Barcelona um mek an ni a, Atletico hian Real champion-na kawng dal an duh dawn avangin inkhel hmuhnawm a beisei ngam.

Tun season-ah Real-in beiseina sang tak nen Xabi Alonso an la lut a, mahse reilote hnuah ban leh a ni a, an player hlui tho Alvaro Arbeloa-a'n a enkawl mek.

Arbeloa hnuaiah Real insiamṭha hret mah se chetsual an ching a, table chung ber luah ve zawk ṭhin mah se an awm rei lo thei hle.

Hospital a lun

Tun hnaiah hliam vangin Real-in harsatna an tawk a, Jude Bellingham, Eder Militao, Rodrygo, Raul Asencio, Dani Ceballos, Ferland Mendy leh Thibaut Courtois te chu hliam vanga Atletico hmachhawn lo tur an ni.

Position tinah player inhliam an neih avangin Arbeloa-a'n a duh angin a rem thei lo. Mahse Real tan Federico Valverde a che ṭha a, Uruguayan midfielder hi khawi hmunah pawh khel se a khel chhe ngai lo a, Atletico lakah pawh an innghahna tur pakhat a ni.

Tlarhma lamah Vinicius Junior a awm dawn a, Brazilian forward hi a che ṭhat lai tak niin, UCL lama goal khung zo hlim a ni a, Atletico lakah pawh khung leh ngei a duh dawn.

Vini bakah Kylian Mbappe a inkhel thei tawh dawn a, tun season La Liga-a goal khung tam ber ni mek, Mbappe hi la dam chiang lo mah se Manchester City nen an inkhelh ṭumin bench aṭangin a lut a, Atletico lakah bul a ṭan lo a nih pawhin a luh ngei a rinawm.

An ṭhat dan berin Real hi inlan dawn lo mah se, an phur vanglai a ni a, Champions League aṭanga Manchester City pet chhuaktu an ni. UCL leh La Liga-ah chiah nomawi an beisei tawh avangin chetsual an duh tawh dawn lo.

Atletico ve thung

Tun season-ah Atletico hriatthiam an har a, beisei an pha lo tih dawnin UCL leh Copa del Rey-ah club lian hnehin an la dam ve ve. La Liga-ah pathumnaah awmin, hmahruaitu Barca nen point 13-in an inthlau a, an champion a beiseiawm tawh loh thung.

Diego Simeone naute zingah keeper Jan Oblak-a dinhmun a chiang lo a, UCL-a Tottenham Hotspur nen an inkhelh ṭumin a inlan tawh lo a, a aiah Juan Musso-a'n goal a veng. Oblak bakah hian Pablo Barrios dinhmun a chiang lo bawk.

Atletico tan Julian Alvarez leh Antoine Griezmann ten tlarhma an ho thei dawn a, an ṭhat dan berin inlan thei dawn lo mah se, Spurs laka goal sarih khung thei an ni a, an hmelma Real champion tir lo turin an theihtawp an chhuah dawn.

Inkhel dangah hmahruaitu Barcelona chuan Pathianni zan dar 6:30-ah Rayo Vallecano an mikhual dawn a, Hansi Flick-a naute hi thlamuang taka Madrid derby en an duh chuan an chak a ngai.