Chelsea-ah Enzo a hlim - Rosenior

Champions League-a Paris St-Germain ngam loa an tlak hnu lawkah Enzo Fernandez chuan Chelsea-a a hma hun a chian loh thu sawi mah se, Blues head coach Liam Rosenior chuan a player chu London club-ah a ngheh thu a sawi.

Enzo hian, "Season tharah he club tan hian ka la khel zel ang em, ka hre lo. Premier League-ah match riat khelh tur kan la nei a, FA Cup a la awm bawk. World Cup khelh kan la hmabak bawk a, chumi zawh lamah ka hma hun tur chu a chiang ang," tiin a sawi a, Blues fans tam tak an hlauthawng.

Mahse, Rosenior chuan, "Tukina training kan ṭan hmain, Enzo nen hian rei tak kan titi a, a thusawi chungchang mai ni loin, club tana a rilru puthmang leh hma kan sawn theih dan tura a ngaihdante kan sawi.

"Enzo hi kan club captain zinga mi a ni a, he club-ah hian a hlim em em thu min hrilh. Hnehna chan a, nomawi chawi a duh a, a thusawi chungchangah pawh, a sawi dan lo deuha a tlang than thu min hrilh. Ka hmuh danah chuan Chelsea tana khelh zel a duh a, he club tana nomawi chawi zel hi a duh a ni," a ti.

Kum 25 mi Enzo hian January 2023 khan Chelsea hi Benfica aṭangin a zawm a, a man hi pound maktaduai 107 ngawt niin, a hun laia British club transfer record fee a ni.

Blues-a kum 2032 thleng khel tura contract nei mek Enzo hian tun season-ah Chelsea tan match 45 khela goal 12 khungin, assist vawi ruk a nei a, an player pawimawh zingah a tel.

Chelsea-in tun hnaiah beisei ang result an nei thei lo a, Champions League aṭanga an tlak bakah, season thara UCL khel lo thei dinhmunah an ding mek. Zanin dar 11:00-ah league match khel turin Everton an lenchilh dawn.

Rosenior chuan, "Manager zawng zawng hian hun harsa kan tawng vek a, tun hi ka vawi khat tawnna a ni lo. Manager dang ang thoin ka lo tlawm ve tawh ṭhin a, tuna pawimawh ber chu Everton laka hnehna chan a, kan hun tawn harsa tak hi theihnghilh a ni," a ti.

English coach chuan sawi zawmin, "Champions League khelh kan duh a, sum hlawkna thlir ringawt pawhin kan khelh ngei a ngai a, he club hian UCL khelh a phu a ni - chu chu kan tum ber pawh a ni," a ti a, season thara UCL khel tura Chelsea hlan kai a tum hle.

Chelsea hian an defender Trevoh Chalobah chu zaninah an chhawr thei dawn lo a, PSG laka hliam vanga lakchhuah ngai player hi kar ruk bawr vel a chawl dawn.