A tawpah Chanmari FC an chesual leh tawh!

Indian Football League-ah kai thar Chanmari FC-in Shillong Lajong lakah Christopher Kamei hmangin goal khung hmasa mah se first half leh second half-ah a tawp an khar ṭha lo. Lajong-in injury time-ah ve ve goal an khung a, tun season NorthEast Derby hmasa berah 2-1 in hnehna an chang. Inkhel dangah Sreenidi Deccan leh Namdhari te 1-1 a an inhnehtawk avangin Shillong club hi a chung berah an awm a, nizan lam result a zirin table a danglam thei thung.

Ningani tlai RG Stadium-a inkhelah Mizo club an vanduai a, first half injury time-ah penalty an chawi avangin Phrangki Buam-a'n si phurh a sut. Mizo tlangval Jakob Vanlalhimpuia'n danglamna a rawn thlen a, second half injury time-ah Buam-a goal khung tur a rawn siamsak. Chanmariin chak thei dinhmuna an din hnuah Dempo lakah point khat an hlawh chhuak a, Lajong lakah chak thei dinhmuna an din hnuah an chak lo.

Christo a ṭha

Chanmari FC-in bul an ṭan ṭha a, KC Malsawmsanga'n goalkeeper chiah a hmachhawn hnuah a khung lo. Lajong lamin rawn nawr ve mah se Chanmari captain Zothanmawia'n a hna a thawk ṭha. Brazilian forward Jota-a'n ball a khalh thei a, goal hmaah a vannei bik lo.

Cherhlun tlangval Aron Vanlalrinchhana'n box pawn chiahah freekick a hlawhchhuak a, minute 16-naah Chanmari midfielder Christo-a'n goal kilah tak a pet lut. Dempo nen an inhmachhawn ṭum pawhin Services captain hlui freekick aṭangin Chanmariin goal an khung tawh a, Mizo club-in Christo ke vei lam an hlawkpui hle.

Vanduai leh fimkhur lo

Chanmariin inkhel an thunun a, goal khat ni loin goal khat dang pawh la khung leh turah an ngaih theih. Mahse, first half injury time-ah Everbrightson Sana Mylliempdah chu box chhungah uar takin a tlu a, amah vengtu Lalhmangaihsanga'n (Papuia) box pawna a nek tih loh chu box chhungah a khawih tawh lo.

Mahse, referee-in penalty a pe miau a, Mizo club tan tih theih a awm lo. Buam-a rawn pen chhuakin crossbar a pet per a, a per lehlamin goalline a pel em tih chu inhnial theihna tak a ni. Assistant referee-in goal-ah phar lo mah se referee-in goal-a a pawm miau avangin Lajong-in si phurh an sut.

Chanmariin chak ngei tumin Amuana an luhtir a, Jota leh Betlehem Vengthlang tlangval Amuana ten chance ṭha an nei nghal. Sawmsanga ball pet kawh ṭha zet pawh keeper Siwel Rymbai-a'n ṭha zetin a dang a, goalline a pelh hmain a hui chhuak hram bawk.

Goal khung an tum luatah Chanmari tlarhnung a phui tawk lo a, Lajong substitute Treimiki Lamurong pawhin chance ṭha bik neiin keeper T. Mawia'n a dang. Injury time-ah Lajong-in dinglam aṭangin an nawr a, through ball um luttu Hnahthial tlangval Jakob-a ball ṭha bik chu Buam-a'n chakna goal khung nan a hmang. Mizo club tan sutna hun a awm tawh lo a, Lajong 2-1 in an chak.