Aston Villa-in quarterfinal lut

English club hlun Aston Villa chuan Europa League quarterfinal an lut a, Villa hian Ningani zan khan last 16 second leg-ah 2-0 in Lille an hneh a, aggregate-ah 3-0 a chakin quarterfinal an inpetkai. Villa tan John McGinn leh Leon Bailey ten goal khat ve ve an khung a, Lille-in chhanletna tur an nei lo.

Villa Park-a inkhelah team pahnihte an inhlau tawn a, Villa chungnung hret mah se chance hlauhawm an insiam thei meuh lo. Minute 20-naah Lille tan Ayyoub Bouaddi-a'n a tauh over hlauh a, Bouaddi hian tauh lut ngat se inkhel a danglam thei ang.

First half tawp hma hretin Villa-in chance an nei a, Amadou Onana ball tauh chu Lille keeper Berke Ozer-a'n ṭha takin a dang a, a per chu Jadon Sancho-a'n a pet ṭhelh a, goal ruakah a khung thei lo. Goal lut loin chawlhlawk an hmang.

Villa an vanduai reng lo a, minute 54-naah Emiliano Martinez-a ball pet chhuah chu Sancho-a'n um lutin a cross nghal a, McGinn-a'n harsatna nei loin a khung a, Villa-in hma an hruai.

Goal an chhuah hnuah Lille an hlauhawm a, Olivier Giroud-a'n pet goal mah se a offside avangin pawm a ni lo a, French striker vanneih zan a ni lo. Giroud bakah Noah Edjouma-a'n chance nei mah se Martinez an paltlang thei lo.

Team pahnihten goal an khung tawh dawn loa a lan hnuah, Villa-in an pet goal leh hlauh. Minute 84-naah Ollie Watkins-a ball pek chu Bailey-a'n awlsam takin a pet goal a, Lille tan an si phurh sut zawhna hun a awm tawh lo a, Europa League an mangṭha a ngai.

Unai Emery naute hi Premier League lamah an che fuh thei lo a, Manchester United-in lehpelin palinaah an tla. Villa tan Europa League-ah chiah nomawi an beisei theih tawh avangin champion ngei an tum ang.

Inkhel dangah Premier League club Nottingham Forest chuan penalty-ah Midtjylland hnehin quarterfinal an lut bawk. Forest hian Nicolas Dominguez leh Ryan Yates hmangin hma an hruai a, Danish club tan Martin Erlic-a'n a sut ṭhenin first leg nen belhkhawmin 2-2 in hun pangngaiah an inhnehtawk.

Penalty-ah Forest tana pettu pathumten an pet goal vek a, Midtjylland-in an pet goal ve theih loh avangin 3-0 in Forest an chak.