Spurs coach Tudor thubuai an siamsak

Tottenham manager Igor Tudor chu referee chungchanga a ṭawngkam mawi lo tak avangin Football Association chuan thubuai an siamsak a, Thawhṭanni thleng a thubuai chungchanga insawifiah turin hun pek a ni.

Tudor hian Spurs-in 2-1 a Fulham an ngam loh ṭumin referee Thomas Bramall a sawisel a, London club coach lailawk hian, "Kha referee kha ka ngaina lo. Mualneitu lam referee ni mai awm a ni a, ka ngaih a tiṭha thei lo," a ti!

Croatian manager hi Harry Wilson-a goal pawm chungchangah a lawm lo a, goal luh hma hian Raul Jimenez chu Radu Dragusin lakah a foul-ah a ngai a, mahse, referee-in goal-ah a pawm miau si.

Tudor chuan, "Thutlukna reng reng kha Fulham tana siam ang mai a ni a, kha referee khan football a hrethiam lo a nih kha," a ti a, a rilru a na tlat!

FA chuan, "Tudor hian match official-te zahawmna tibawrhbang thei zawngin ṭawngkam a hmang a ni," an ti a, thubuai an siamsak.

Spurs hi coach lailawk Tudor hoa an match hmasa paliah an tlawm vek a, mahse, tun hnaiah an insiamṭha. Anfield-ah 1-1 a Liverpool an draw hnuin, Champions League round of 16 second leg-ah 3-2 in Atletico Madrid an hneh.

Mahse, London club hi first leg-ah 5-2 a an lo tlawm tawh avangin, inkhel pahnih belhkhawmah 7-5 in an tlawm ta tho a, Pathianni zan dar 7:45-ah Nottingham Forest chu league match khel turin an mikhual zui ang.

Spurs hi Premier League table-ah 16-na ni mekin, an hnuai chiahah Forest hi an awm - team pahnih inkarah point khat chiah a awm a, tlak hlau tan tlawm a thiang tawh lo.