Sarr-a'n Palace quarterfinal luhpui

Ningani zan Conference League inkhelah Crystal Palace chuan 2-1 in AEK Larnaca an hneh a, quarterfinal an lut. Palace tan Ismaila Sarr chuan goal hnih a khung a, Larnaca tan Enric Saborit-a'n goal khat khung ve mah se Palace hneh nan a tawk lo.

First leg-ah team pahnihten goal an khung thei lo a, quarterfinal lut turin goal an khung a ngai tih an hria a, goal a lut hma.

Minute 13-na lekah Adam Wharton-a ball pek ṭha zet chu Sarr-a'n a um lut a, Larnaca keeper Zlatan Alomerovic paltlangin goal ruakah a khung a, Palace-in hma an hruai.

Mualneitu Larnaca an vanduai reng bik lo a, minute 63-naah Saborit-a'n corner aṭangin a tauh lut a, an si phurh a sut. Palace defender ten Saborit an veng ṭha tawk lo.

Larnaca lawm chhung a rei lo a, minute 10 hnu lawkah goal khungtu Saborit-a'n Sarr a pawh thluk avangin yellow card pahnihna a hmu a, hnawhchhuah a ni. Player kim loin khel mah se Larnaca in hun pangngaiah goal an chhuah tawh lo a, extra time khelh a ni.

Extra time khelh a nih hnuah Palace an hlauhawm a, minute 99-naah goal khung lehin, corner aṭanga a ball hmuh chu Sarr-a'n chakna goal atan a khung. Senegal forward hian hattrick siamna chance nei mah se goal bar a pet per hlauh. Goal dang lut tawh loin inkhel a tawp zui a, Palace an chak hram.