Musiala a inhliam leh tawh

Bayern Munich midfielder Jamal Musiala chu chuan a ke rekah hliam a tuar a, a chawlh chen tur sawi lo mah se kar hnih tal chu a chawlh a ngai dawn.

German midfielder Musiala hi nikum July-a Paris Saint Germain nen Club World Cup-a an inhmachhawn ṭumin khatih laia PSG keeper, Gianluigi Donnarumma nen an intihpalh avangin a ke ruh a tliak.

Musiala hi ni 200 dawn a chawlh hnuah kumin February khan a lo kir leh a, ngai awh lo mah se goal a khung leh tawh a, Bayern an lawm hman viau.

Mahse March 11, Nilaini zana Atalanta nen Champions League-a an inkhelh ṭumin Musiala hian a ke rek a tina leh a, second leg-ah squad-ah a awm tawh lo.

Germany coach Julian Nagelsmann chuan, Musiala hi kumin June-a khelh ṭan tur World Cup-ah chhawr a duh avangin March 28, Zirtawpnia Switzerland nen friendly match an khelh hunah a ko dawn lo niin a sawi.

Zanin dar 8-ah Bayern-in Union Berlin an mikhual dawn a, Bayern hi kar hmasa khan Bayer Leverkusen an inhnehtawk a, an hnuai chiaha awm Dortmund nen point kua chiahin an inthlau.

Match riat chiah khelh tur awm mah se Bayern hi an la chetsual theih avangin an fimkhur a ngai. Zaninah Bayern tan Musiala a inlan thei dawn lo a, mahse Bavarians hian hmatawng an neih ṭhat bakah Harry Kane a rawn kir leh tawh a, Vincent Kompany tan lungngaihna tur a awm lo.