Inter hmaah tlak hlau Fiorentina

Seria A hmahruaitu Inter Milan-in Pathianni zan dar 1:15-ah Fiorentina an lenchilh dawn a, champion tum leh inhamtan tum an nih avangin inkhel hmuhnawm tak a nih a beiseiawm.

Hmahruaitu ni mah se Inter hi an match hnuhnung pahnihah hnehna an chang zo lo a, match kua chiah khelh tur awm tawh mah se an la chesual thei tih a lang.

Inter tan Lautaro Martinez dinhmun a chiang lo a, Argentine forward Martinez hi Champions League-a Bodo/Glimt an hneh loh ṭumin a chawnah hliam a tuar a, bench aṭangin lut zeuh zeuh mah se ngai a la awh thei lo.

Martinez tel loin Inter tlarhma an hriam tawk lo a, Pio Esposito che chhe lo mah se Martinez hmun ruak hnawh khat turin a ruh a la no a, Ange-Yoan Bonny leh Marcus Thuram ten beisei an pha lo bawk.

Inter hi an hmelma AC Milan-in an chetsual hun an chang reng a, Serie A-ah match a tam tawh loh avangin an champion duh a nih chuan an chesual thiang tawh lo.

Hetihlai hian Fiorentina-in harhna an chang a, an match hnuhnung pangaah vawi khat chiah an tlawm a, point 28 hmuin 16-naah an awm a, relegation zone an chhuahsan.

Fiorentina thawhchhuah nan Moise Kean a pawimawh a, Italian forward hian league-ah gooal riat a khung tawh a, Inter lakah an innghahna ber a ni dawn.