Barcola chawlh chen tur hriat loh

Paris Saint Germain forward Bradley Barcola chu a ke rek hliam vangin a chawl dawn a, a chawlh chen tur hi la chiang lo mah se a rei dawn niin khawthlang chanchinbuten an sawi.

Barcola hi Nilaini zana Chelsea nen UCL last 16 an khelh ṭumin a inhliam a, minute 59-naah lakchhuah niin Desire Doue-a'n a thlak - lakchhuah a nih hmain Barcola hian goal khat a khung hman tho.

Kum 23 mi Barcola hi March 26, Ningani zana Brazil nen friendly match an khelh hunah a inlan thei dawn lo a, March 29, Pathiannia Colombia an hmachhawn hunah a inlan thei dawn lo bawk.

French forward Barcola hi tun hnaiah a che ṭha a, match hnuhnung paruk aṭangin goal nga a khung. Tun season Ligue 1-ah goal sawm khung tawhin PSG player zingah ani aia khung hnem an awm lo.

PSG hian zanin dar 1:35-ah Nice an lenchilh dawn a, Barcola tel loin an khelh a ngai dawn. PSG hian kar hmasaah league match an khel lo a, anmahni hnaih bertu RC Lens aia match khata khel tlem zawk chungin point khatin an sang zawk. An hmahruaina hi tihzau an duh chuan Luis Enrique naute an chak a ṭul.