Dr TAo Final-ah Mizoram Vs Sikkim

NorthEast state-te football hmanga inelna Dr T Ao Football final chu vawiin tlai dar 5:00 hian Indira Gandhi Stadium, Kohima-ah khelh a ni dawn a, Mizoram leh Sikkim ten nomawi an inchuh ang. 

Nimin tlai khan Mizoram hian entu sing khat chuang hmaah inelna thlengtu Nagaland chu 2-1 in an lehthal a, Dr TAo Football-ah a lungthu kim nana nomawi chawi turin an dinhmun a ṭha hle. Semifinal hnuhnung zawkah Sikkim-in extra time-ah Arunachal Pradesh 3-1 in an hneh. 

Mizoram coach Lalremtluanga'n semifinal-ah an ṭhat dan bera a ngaihin player a rem a, Sikkim an hneh loh ṭum aṭangin player pasarih ngawt a thlak. Nagaland-in group B-a an khingpui Manipur, Tripura leh Arunachal Pradesh hneh vek mah se Mizoram lakah an che thei lo.

Mizoramin goal chance an ngah nghal a, amaherawhchu F. Lalrinpuia goal hmaah a vannei tawk lo. Tun inelnaa top scorer ni mek Rhitsho Mero erawh goal-ah a hmui a, minute 18-naah Nagaland goal hmahruai a khung.

Sikkim laka vanduai tawh Mizoram an hlauthawng a, inkhel thunun mah se a hmawr bawk an harsat. Tawnhriat nei ṭha Malsawmfela pawh goal chance hlah zingah a tel a, hlauhthawnna belhchhah turin Nagaland keeper-in box chhungah Valpuia ti tlu mah se referee-in penalty a pe lo.

Amaherawhchu rawlthar duhawm Lalchungnunga Chhangte-in puitling zingah tih thei a nei tih a pholang a, box chhung dinglamah mawi taka petna tur insiamin minute 43-naah siphurh sutna goal a khung. 

Second half ṭantirhah Mizoram tan Sawmfela inlarin David Lalrinmuana corner pet chu goal-ah a chantir a, chakna goal a ni zui bawk. Hun tawp lamah Nagaland-in nawr ve bawk mah se Mizoram keeper Lalmuansanga an paltlang thei lo.

Mizoram manager T. Vanlalhluna chuan, "Team ṭha zawk kan ni a, chak lo thei erawh kan ni thung. Referee-in penalty min pek duh loh kha chuan thisen hi a lum nghal a, kan thin a rim takzet. Kan naute an thawkrim a, an khel ṭha a, final kan thlen avangin kan lawm hle," tiin Vanglaini a hrilh.

Dr T Aoa Football-ah Mizoram hi kum 2011 khan Hluna leh coach HC Zarzoliana hoin Gangtok-ah inelna thlengtu Sikkim hnehin an champion tawh a, Mizoram hian kum 2014 khan Lammualah nomawi chawi lehin tun hi final an thlen lehna hmasa ber a ni.

Sikkim-in final an luhna hmasa berah an mualah Mizoram an hneh lo a, tun ṭumah hian hneh tawh ngei an duh ang. Chutihrualin group stage-ah 2-1 a an hneh loh Sikkim lakah tlawm nawn an duh dawn lo.

Mizoram manager Hluna chuan, "Sikkim nen kan intum hmasak kha chuan semifinal kan luh tawh avangin player kan dah ṭha a, tunah erawh kan dam kim a, hliam kan neih loh bawk avangin hmachhawn an châkawm khawp mai. Chutihrualin chapo thei kan ni lo," tiin Vanglaini a hrilh.

Final-ah Mizoram hi rinkai zawk ni mah se Sikkim hian inelna hnuhnung ber kum 2016-ah pawh final an lut tih hriat a ṭha. Closing ceremony hi tlai dar 3:00 aṭangin ṭan a ni dawn a,  YouTube channel 'Nagaland & North East Cornerstone TV' ah en theih a ni ang.