Moses-a'n goal mawi a khung

Indian Football League-ah Gokulam Kerala-in March 20, Zirtawpni zan khan Dempo SC 2-0 in an hneh a, Kerala club hian a vawi khat nan hnehna an chang. Kerala club tan Moses Lalrinzuala'n bul a ṭan a, Khatla East tlangval hian box pawn aṭangin mawi zetin minute 18-naah a khung.

Gokulam hian I League-ah nomawi vawi hnih an chawi tawh a, IFL-ah beisei angin bul ṭan ṭha lo mah se Dempo SC an hneh avangin panganaah an invawrh chho nghal. Moses-a telna team hian March 26, Ningani hian Shillong Lajong an mikhual ang a, March 31, Thawhlehniah Mizo club Aizawl FC an mikhual leh ang.