Kolasib Open-ah Innocent-a bawk champion

Mizorama tennis inelna ngaihhlut hlawh ber pawl, LBS Suzuki Kolasib Open 2026 chu March 21, Inrinni khan khelh zawh a ni a, inelna ngaihhlut hlawh ber Men's singles-ah Innocent Lalrindika chuan Joseph Z Khuma chu 6-3 6-1 a hnehin a champion.

Nikum Kolasib Open-ah khan Innocent-a hi a lo champion tawh bawk a, a champion nomawi a humhim nawn. Hetihlai hian Men's doubles lamah Innocent hian Lalthanmawia nen ṭang dunin final lut tho mah se, Basil L Khuma leh Joseph Z Khuma te ṭangdun chu 6-4 6-3 in an ngam lo thung - Joseph hian nomawi pahnih a hawn.

Kolasib Tennis Court, Project Venga neih inelnaah Joseph Z Khuma hian 35+ singles-ah Benjamin Sialo chu 6-1 6-1 a hnehin a champion a, final pathum lutin, pahnihah nomawi a chawi tihna a ni.

March 17 aṭanga neih ṭan inelnaah hian hmeichhe singles lamah Vanlalnunhlimi a champion ve thung a, ani hian Grace VL Khawngaihi chu 8-4 in a hneh thung.