Kane-a'n Lewy record hnaih zel
Inrinni zan khan Bundesliga hmahruaitu Bayern chuan 4-0 in Union Berlin an hneh a, Harry Kane-a'n goal khat khungin tun season-ah goal 31 a khung tling chiah.
Kane hian Bundesliga season khata goal khung hnem ber record Robert Lewandowski (41) siam chu goal sawm chauhin a pha tawh lo. England captain hian record khum turin match sarih khelh tur a la nei a, record thar siam thei dinhmunah a ding. Union Berlin lakah hian Kane bakah Michael Olise-a'n goal khat khungin, Serge Gnabry-a'n goal hnih a khung bawk.
Allianz Arena-a inkhelah mualneitu an hlauhawm nghal a, goal erawh an khung nghal lawk lo. Kane leh Lennart Karl ten goal an khung nghal teuh hle a, German rawlthar Karl hian keeper chiah a hmachhawn hnuah goal ban a pet per a, a vanneih zan a ni lo.
Goal hmaah Bayern an vanduai a, Olise leh Kane ten chance duhawm an hlah leh a, goal an khung mai theih loh avangin Berlin lakah Vincent Kompany hote chesual ve thei an ni. Mahse Bayern an vanduai reng lo a, minute 43-naah Olise-a'n Kim Min-jae aṭanga a ball hmuh chu Berlin defender Stanley Nsoki a bum hnuah mawin takin a pet kual lut a, Bayern hma a hruaipui. Olise tan tun season-a a goal 11 khungna chiah a ni.
Bayern-in an la duhtawk mai lo a, first half hun pek belhah Berlin keeper Frederik Ronnow tihsual chu Gnabry-a'n pet nghalin, defender te inkarah tak a pet lut a, first half-ah 2-0 in hma an hruai.
Second half-ah Bayern an hlauhawm lehnghal a, minute 49-naah Kane inlarin a ball hmuh chu goal kilah tak a pet lut a, an goal thumna a khung. A vanneih zan ni se Kane hian goal tam zawk khung thei tur a ni.
Minute 67-naah Gnabry-a'n a goal hnihna chu kawh takin a khung leh a, mikhual team Berlin tan an siphurh sut zawh nghaihna a awm tawh lo a, nuamsa takin Bayern an chak. Bavarians hian point 70 hmuin pakhatnaah an awm zel a, anmahni hnaih bertu Borussia Dortmund aiin kuain an sang zawk.
Bundesliga-ah match sarih chiah khelh tur a awm tawh a, Vincent Kompany hoin Bayern-in season zawnin nomawi an chawi ngei a rinawm ta hle.