Milan an chak hram

AC Milan chuan Inrinni zan khan an mualah 3-2 in Torino an hneh hram a, hnehna chang turin vanneihna an mamawh tel.

Milan tan Strahinja Pavlovic, Adrien Rabiot, Youssouf Fofana ten goal khat ṭheuh an khung a, Torino chak nan Giovanni Simeone leh Nikola Vlasic te goal khung a tawk zo lo.

San Siro-a inkhelah mualneituin goal an khung hmasa zawk a, minute 37-naah Pavlovic-a long shot kawh tak chuan goal bar a fuh hmasak hnuah goal chhungah a lut a, Milan-in hma an hruai. Goal an chhuah danah Torino keeper Alberto Paleari dem theih a ni lo.

Torino-in minute sarih hnu lawkah an chhanglet ve nghal a, Vlasic-a goal shot chu Milan keeper Mike Maignan-a'n dang mah se a per let chu Simeone-a'n hnai tak aṭangin a khung a, Maignan tan dan ngaihna awm tawh lo a, 1-1 in chawlhlawk an hmang.

Second half-ah Milan an hlauhawm nghal a, minute 54-naah Rabiot-a'n goal ruakah a pet lut a, a team hma a hruai nawnpui. Milan an phur laklawh a, minute hnih hnu lawkah Fofana-a'n kawh takin a pet goal lehnghal a, an hmahruaina a belhchhah.

Torino tan Vlasic-a'n minute 83-naah penalty aṭangin an siphurh a sut ṭhen mah se, goal dang an khung thei tawh lo a, Milan-in hnehna an chang.