Mumbai-in Mohun Bagan an hneh

Zirtawpni zan Indian Super League inkhel ngaihven hlawhah Mumbai City chuan 1-0 in Mohun Bagan an hneh a, Kolkata club tan tun season-a an tlawm vawi khatna a nih laiin, Mumbai City erawh tlawm an la nei lo tluang zel.

Mumbai tan Noufal PN chuan minute 27-naah goal a khung a, mualneitu Mohun Bagan-in a chhanletna tur an neih loh avangin an tlawm - Mumbai hian ISL table chung ber an luah zui.

Mikhual team tan Lallianzuala Chhangte a langsar a, mahse, Lunglei tlangval hi a vanneih zan a nih loh avangin goal a khung thei lo. Mumbai tan Lianzuala bakah Lalnuntlunga Bawitlung leh Hmingthanmawia Ralte (Valpuia) ten inkhel bul an ṭan a, bench aṭangin Zothanpuia a lut bawk.

Valpuia hi Inter Kashi nen an inkhelh ṭumin red card hmu mah se, ISL disciplinary committee chuan Mizo fullback red card chawi hi an 'suspend' rih a, hei vang hian Valpuia hi a inlan thei.

Zirtawpni zan inkhel dangah Odisha chuan 4-1 ngawtin NorthEast United an sawp - Odisha tan Rahul KP chuan goal hnih khungin, Subham Bhattacharya leh Bekey Oram (own goal) ten goal khat ve ve an khung a, tun season-a a vawi khat nan Odisha an chak.

Odisha tan Isak Vanlalruatfela, K. Lalṭhathanga (Puitea), Vanlalzuidika Chhakchhuak leh K. Lalrinfela ten inkhel bul an ṭan a, NorthEast United tan striker Lalrinzuala chu bench aṭangin a lut bawk.

Zirtawpni zan inkhelah Odisha tan Isak-a a langsar a, mahse, a vanneih zan a ni lo - a goal khung lah Bekey Oram-a'n a lo khawih fuh avangin 'own goal' angin record a ni a, tun season-a Odisha chak vawi khatna a ni.

Inrinni zan inkhelah Punjab FC chuan 3-1 in Kerala Blasters an hneh a, Samir Zeljković, Bede Osuji leh Dani Ramírez ten goal khat ṭheuh khungin, Blasters tana Fallou Ndiaye goal khungin awmzia a nei phak lo.

Punjab tan league match nga khelh tawha an vawi hnih chakna a nih laiin, Kerala club erawh match ruk aṭangin point khat chiah an la hmu thung.

Blasters tan Freddy Lallawmawma chu bench aṭangin a lut a, Mizo player dang inlan erawh an awm lo.