Hawaii-in kum 20 chhung tuilen nasat ber tuar

US-a Hawaii state-ah kar liam ta khan ruahsur nasa avangin tuilian nasa tak a thleng a, kum 20 chhung state-a tuilen nasat ber ṭum a thleng. Ruah hi a la sur chhunzawm dawn nia sawi a ni bawk.

Ruahsur leh tuilian vang hian thuneitute chuan Honolulu hmarlama cheng, mi 5,500 te chu hmun him lama insawnchhuak turin an hriattir. State chhung hmun tam zawk chuan tuilian hi an tuar a, Oahu hmarlama Haleiwa leh Waialua te chuan an tuar nasa zual a ni.

Governor Josh Green chuan ruahsur leh tuilian hian thil tam tak a tichhia a, heng zingah hian airport, school, kawngpui, chenna in leh hospital-te pawh an tel tih a sawi. Thil chhe hlut zawng hi USD tld 1 hu a tling tih a tarlang. White House lam pawh an bepawp a, sorkar laipui lam pawhin puih an tiam thu an hrilh tih a sawi.

Ruahsur leh tuilian avanga thi report a awm lo a, mahse mi 10 vel chuan hliam tuarin damdawi-inah enkawl an ni. Tuilian avanga tangkhang leh harsatna tawkte chu thlawhtheihna hmangin hruai chhuah an ni a, drone hmangin tuilian dinhmun pawh thlithlai reng a nih thu Green chuan a sawi bawk.